Turkiya prezidenti Rajab Toyyib Erdo‘g‘on Ramazondan keyin (may oyida) Tog‘li Qorabog‘dagi Shusha shahriga tashrif buyurish niyati borligini ma’lum qildi. Bu haqda u Turkiy tilli davlatlar hamkorlik kengashining norasmiy sammitida aytib o‘tdi, deb yozadi “RBK”.
“Turkiyzabon mamlakatlar tomonidan Qorabog‘dagi turkiy yodgorliklarni himoya qilish va qayta tiklashda Ozarbayjonni qo‘llab-quvvatlash muhim ahamiyatga ega. Umid qilamanki, tez orada Ramazon bayramidan so‘ng biz Shushaga tashrif buyuramiz, bu biz uchun yana bir bayramga aylanadi”, — dedi Turkiya rahbari.
Ta’kidlanishicha, Erdo‘g‘on Shushaga Ozarbayjon prezidenti Ilhom Aliyev bilan birga kelish niyatidaligini bildirgan.
Turkiy tilli davlatlar hamkorlik kengashining videoanjuman shaklida o‘tgan norasmiy sammiti 31-mart, chorshanba kuni bo‘lib o‘tgan edi. Unda O‘zbekiston Prezidenti Shavkat Mirziyoyev ham ishtirok etdi. Tadbirda tashkilot doirasida iqtisodiyot, savdo, transport sohalaridagi ko‘p qirrali amaliy hamkorlikni hamda madaniy-gumanitar aloqalarni mustahkamlash masalalari yuzasidan fikr almashildi.
Mavzuga doir: Turkiya prezidenti 2021-yilda O‘zbekistonga keladi
Shusha vayron qilinganidan so‘ng darhol Moskva vositachiligida Yerevan va Boku mojaroni to‘xtatish to‘g‘risida kelishuvga erishdi. Unga muvofiq Tog‘li Qorabog‘ning muhim qismi Ozarbayjon harbiylari nazorati ostiga o‘tdi va tinchlik shartnomasiga rioya etilishini nazorat qilish Rossiya tinchlikparvar kuchlariga topshirildi. Qo‘shma kuzatuv markazi ishida bir necha o‘nlab turkiyalik harbiylar ham ishtirok etmoqda. Ilhom Aliyev Ozarbayjonga tajovuz qilinsa, Turkiyadan harbiy yordam so‘rashga tayyorligini ma’lum qilgan.
Eslatib o‘tamiz, 2020-yilning dekabr oyida Tog‘li Qorabog‘dagi urushda Armanistonning qariyb 3 ming harbiysi halok bo‘lgani ma’lum qilindi. Ozarbayjon Mudofaa vazirligi esa dekabr oyining boshida jangovar harakatlar davomida 2783 nafar harbiy xizmatchi halok bo‘lgani, yana 100 nafardan ortiq harbiy xizmatchi bedarak yo‘qolgan deb hisoblanayotgani va gospitallarda 1245 nafar harbiy davolanayotganini ma’lum qilgandi.
Izoh (0)