Qozog‘iston Sog‘liqni saqlash vazirligi mamlakat fuqarolari orasida WhatsApp messenjerida Kavasaki sindromi kasalligiga chalinish holatlari ko‘paygani haqida tarqalgan xabarlarni inkor etdi. Bu haqda Tengrinews xabar berdi.
Qozog‘iston SSV Kavasaki sindromiga o‘xshash alomatlar yoki multitizim yallig‘lanish sindromi COVID-19’ga chalinib, undan tuzalgan bolalarda uchragani, biroq hozirda mazkur xastalikning mamlakat bo‘ylab tarqalmaganini bildirgan.
“Multitizim yallig‘lanish sindromi — bolalarda COVID-19’dan keyin uchraydigan immunologik hodisa. Sindrom koronavirus infeksiyasidan keyin 4—6 haftada rivojlana boshlaydi. Ayni vaqtda Kavasaki sindromiga o‘xshash mazkur alomatlar mamlakatimizda koronavirusga chalinib, undan tuzalgan bolalarda kuzatilmayapti. Biroq COVID-19 bilan kasallanishga aloqador holatlar ko‘paysa, ushbu sindromga chalinish ehtimoli ham ko‘payishi mumkin. Shu sababli epidemiyaga qarshi tavsiya qilingan qoidalarga rioya etish zarur”, — deyilgan Qozog‘iston SSV xabarida.
Vazirlik Kavasaki va shunga o‘xshash sindrom bu bitta kasallik emasligini, bir-biridan farq qilishini qayd etgan.
Kavasaki kasalligi — bu har qanday infeksiyadan keyin rivojlanishi mumkin bo‘lgan, kamyob xastalik. Isitma, toshma toshishi, konyunktivit, bo‘yindagi limfa tugunlarining kattalashishi, tanada suv yig‘ilishi kasallikning asosiy alomatlari hisoblanadi.
COVID-19’dan keyin kuzatiladigan Kavasaki sindromiga o‘xshash holatda esa tanada infeksiyadan keyingi kechikkan immunologik javob qaytarish funksiyasi ishga tushadi. Bu nafaqat bolalarda, balki kattalarda ham kuzatilishi mumkin.
Mavzuga doir: Kavasakisimon sindrom shaklidagi yangi kasallikning asosiy klinik belgilari ma’lum qilindi
Eslatib o‘tamiz, 2020-yilda Qozog‘istonda COVID-19’dan tuzalganidan keyin Kavasaki sindromiga o‘xshash kasallik bilan og‘rigan ikki nafar bola vafot etgandi.
Izoh (0)