Ukrainada uchta telekanal yopib qo‘yilgach, “Muxolifat platformasi — Hayot uchun” partiyasi raisdoshi Vadim Rabinovich Oliy Rada minbarida turib, prezident Vladimir Zelenskiyga nisbatan impichment jarayoni boshlanishini ma’lum qildi, deb yozadi “RBK”.

Foto: Reuters

Bunga prezidentning “112”, ZiK va NewsOne telekanallariga qarshi sanksiyalar kiritish qarori sabab bo‘ldi.

Rabinovich Vladimir Zelenskiyni Uy-joy va kommunal xizmatlar tariflari, COVID-19’ga qarshi vaksinaning yo‘qligi, tibbiyotning xarobligi va boshqa muammolar haqidagi “haqiqatni odamlarga yetkazayotgan”larning “og‘zini yopish”da aybladi.

“Bugun kechasi, shaytonlar esa doim tunda ishini qiladi, mustaqil Ukraina tarixida birinchi marta uchta muhim telekanal o‘chirib qo‘yildi”, — dedi Rabinovich. “Zelenskiy Ukraina xalqiga qarshi chiqdi, u Ukrainaning yevropacha kelajagiga qarshi chiqdi, chunki fashizm — bu kelajak ham emas, yevropacha tanlov ham emas. Kitoblarni taqiqlash va yoqish, kanallarni yopish, jurnalistlarni o‘ldirish — bu haqiqiy fashizm”, — deb hisoblaydi deputat.

“Esda tuting, siz na partiyamizning, na millionlab saylovchilarimizning og‘zini yopa olmaysiz. Siz bizni qotilliklar, telekanallarni taqiqlash, terror bilan jim qila olmaysiz. Biz prezident Zelenskiyga nisbatan impichment jarayonini boshlaymiz”, — dedi Rabinovich.

Zelenskiy Ukrainadagi uchta telekanalga qarshi sanksiyalar haqidagi buyruqni 2-fevral kuni imzoladi. Ushbu kanallar “Muxolifat platformasi — Hayot uchun” partiyasi siyosiy kengashi rahbari Viktor Medvedchukka aloqador deb hisoblaniladi. Medvedchukning o‘zi prezident qarorini noqonuniy deb atadi.

Ukrainada yanvardan Uy-joy va kommunal xizmatlar keskin qimmatlashdi, shu jumladan, gaz, issiq suv va isitish tizimi uchun to‘lovlar oshdi. Buning natijasida ketma-ket norozilik aksiyalari bo‘lib o‘tdi.