Gruziyada rossiyalik jurnalist Vladimir Pozner va uning mehmonlari izolyatsiya va karantin qoidalarini buzgani uchun jarimaga tortildi. Bu haqda Gruziya Ichki ishlar vazirligi ma’lumotlariga asoslanib, “RBK” xabar berdi.
Nazorat politsiyasi xabariga ko‘ra, izolyatsiya va karantin qoidalarining buzilishi faktlari bilan 32 kishi jarimaga tortildi. Izolyatsiya va karantin qoidalarini buzganlik uchun jarima qonunga muvofiq 2 ming larini (600 dollar atrofida) tashkil qiladi.
Pozner Tbilisiga o‘zining tug‘ilgan kunini nishonlash uchun kelgan edi, 1-aprelda u 87 yoshga to‘ldi. Uning tashrifidan so‘ng shahardagi jurnalist turgan mehmonxona yaqinida norozilik aksiyasi boshlandi. Mehmonxona yaqinida politsiya bilan to‘qnashgan norozilik namoyishchilari binoga tuxumlar uloqtirgan. Bundan tashqari, ular Mehnat inspeksiyasiga Pozner va uning mehmonlari kechki soat 21:00 dan boshlab mehmonxona restoranida to‘planib, Gruziyaning amaldagi komendantlik soatini buzgani to‘g‘risida xabar bergan. Natijada mehmonxona restoraniga 10 ming lari (3000 dollar atrofida) jarima solingan.
Jurnalistning mehmonlaridan to‘qqiz nafari karantin va izolyatsiya qoidalarini buzgan deb topilmagani sababli jarimaga tortilmagan.
Keyinchalik “RBK” Gruziyada bo‘lib o‘tgan noroziliklar fonida Poznerning mamlakatni tark etgani haqida xabar berildi. Xabarga ko‘ra, jurnalist va uning hamrohlari Tbilisi aeroportidan uchib ketgan.
2017-yilda Change.org veb-saytida Poznerning Gruziyaga kirishini taqiqlashni talab qilgan petitsiya ro‘yxatdan o‘tkazilgan edi. Unda aytilishicha, 2-aprel kuni Imedi telekanali efirida Pozner Gruziya qonunlari va jurnalistlik axloq qoidalarini buzib, “1970-yillarda Gruziyaga tashrif buyurganida gruzinlar va abxazlar o‘rtasidagi munosabatlar to‘g‘risida hikoya qilib bergan”.
Mazkur efirdan so‘ng Pozner “Birinchi kanal”da intervyuda shaxsan ko‘rganlari haqida aytib berganini ta’kidlagan. “Men 70-yillarda Abxaziyada bo‘lganimda, bir necha bor abxaziyaliklar va gruzinlar o‘rtasidagi munosabatlar tarixiy jihatdan unchalik yaxshi bo‘lmaganiga amin bo‘ldim. Gruzinlar abxaziyaliklarni ikkinchi darajali, qoloq va ahmoq odamlar deb bilardi, men o‘z ko‘zlarim bilan u yerdagi janjallarda abxaziyaliklarni qanday kaltaklangani ko‘rdim. Albatta, bu ilmiy tadqiqot emas. O‘zlarining erkin matbuotlari bilan faxrlanadigan va turli fikrlarga tolerant munosabatda bo‘ladigan Gruziyada mening aytganlarim xotirjam qabul qilinadi, deb o‘ylagandim. Adashgan ekanman. U yerda meni barcha og‘ir gunohlarda, tashviqotda, Rossiya manfaatlarini himoya qilishda ayblashdi”, — degan edi Pozner o‘sha paytda.
Gruziya bosh vaziri Irakli Garibashvili AQSh fuqarosi bo‘lgan Poznerning Gruziyaga tashrif buyurish to‘g‘risidagi qonunni buzmaganini aytdi. “U Gruziyaga tez-tez kelib turadi. Bu uning navbatdagi shaxsiy tashrifi edi. Bundan tashqari, hukumat qaroriga binoan, u va unga hamroh bo‘lgan shaxslarning yonida kovid-pasportlari va PZR-testining salbiy natijalar bo‘lgan. Shuning uchun ular mamlakatga qonunlarga to‘liq mos ravishda kirib keldi” — dedi hukumat rahbari.
Izoh (0)