Jizzax va Sirdaryo viloyatlari chegarasida kuchli gumburlash ovozi eshitildi, deya xabar berdi “Sirdaryo xabarlari” nashri.
Ma’lum qilinishicha, 30-mart kuni kechasi taxminan soat 21:30 larda Sirdaryo viloyatining Sardoba tumani “Paxtakor” mahallasiga yaqin joy va Jizzax viloyatining Zarbdor tumanlari chegara qismida kuchli gumburlash ovozi eshitilgan.
Sardobada yashovchi mahalliy aholi vakillaridan birining so‘zlariga ko‘ra, mazkur gumburlagan ovoz gaz quvurining yorilishi yoki portlashi bilan bog‘liq.
Hozircha mazkur hodisa yuzasida hech qanday rasmiy ma’lumotlar berilmagan.
Eslatib o‘tamiz, dekabr oxirlarida Gulistonda ikki marta kuchli gumburlash ovozi eshitilgandi. Keyinroq FVV Seysmoprognostik monitoring Respublika markazi bu zilzila oqibatida yuzaga kelgani, zilzila o‘chog‘i yer yuzasiga yaqin bo‘lgani sababli gumburlash ovozi eshitilganini ma’lum qilgan edi.
Ta’kidlash kerakki, bu kabi gumburlash ovozlari bunga qadar Namangan viloyatida ham bir necha bor kuzatilgan edi. Xususan, 2018-yil 6-dekabr kuni Namanganda ilk bor qattiq gumburlash ovozi eshitilgandi. O‘shanda avvaliga Mingbuloq neft konida portlash yuz bergani ma’lum qilindi, keyinchalik bu xabar rad etildi. 14-dekabrda esa bu holat yana takrorlangandi. 2019-yilning 29-martida Namanganda uchinchi marta gumburlash sodir bo‘lgan. Favqulodda vaziyatlar vazirligi ushbu gumburlashlar tabiat hodisasi bilan bog‘liq emasligini ma’lum qilgan.
Izoh (0)