O‘zbekistonning turli hududlaridan Toshkent shahriga kelib o‘qiyotgan oilali talabalar uchun alohida yotoqxona qurish lozim. Bu haqda Senatning Yoshlar, madaniyat va sport masalalari qo‘mitasi raisi Baxtiyor Sayfullayev “Daryo” muxbiri Musulmonbek Ibrohimov bilan suhbatda aytib o‘tdi.
Senatorning ta’kidlashicha, so‘nggi yillarda oliy ta’lim muassasalarining soni oshgan bo‘lsa-da, talabalar turar joylari shunga monand ko‘paygani yo‘q.
“Hozir rektorlarning cho‘ntagida puli bor — kontraktlar va supek-kontraktlar uchun qilinayotigan to‘lov pullaridan foydalanish kerak. Boshqa tomondan, talabalar to‘layotgan pul yotoqxona xarajatlarini to‘liq qoplashga yetmaydi. Shu bois hukumat yordam tariqasida pul ajratib kelmoqda”, — dedi senator.
Sayfullayevning alohida qayd etishicha, oilali talabalar uchun alohida yotoqxonalar tashkil etish kerak.
“O‘qish davrida yoki undan avval turmush qurgan talablar bor. Tabiiyki, oilali talabalarga yotoqxonada yashash juda noqulay. Yosh bolalari bo‘lsa, boshqa talabalarning o‘qishiga ham xalal berishi mumkin. Hukumat buni ham e’tibordan chetda qoldirmaydi, deb o‘ylayman. Viloyatlardan Toshkent shahriga kelib o‘qiyotgan oilali talabalar uchun har bir oliy ta’lim muassasiga alohida bo‘lmasa ham, bitta umumiy yotoqxona tashkil etish zarur”, — dedi senator.
Ma’lumot uchun, O‘zbekistonda talabalarni turar joy bilan ta’minlash masalasi 2021-yil fevral oyida Toshkent shahrida ijarada yashagan besh nafar talaba is gazidan zaharlanib vafot etganidan so‘ng kun tartibidagi mavzuga aylandi.
Izoh (0)