Жиззах ва Сирдарё вилоятлари чегарасида кучли гумбурлаш овози эшитилди, дея хабар берди «Сирдарё хабарлари» нашри.
Маълум қилинишича, 30 март куни кечаси тахминан соат 21:30 ларда Сирдарё вилоятининг Сардоба тумани «Пахтакор» маҳалласига яқин жой ва Жиззах вилоятининг Зарбдор туманлари чегара қисмида кучли гумбурлаш овози эшитилган.
Сардобада яшовчи маҳаллий аҳоли вакилларидан бирининг сўзларига кўра, мазкур гумбурлаган овоз газ қувурининг ёрилиши ёки портлаши билан боғлиқ.
Ҳозирча мазкур ҳодиса юзасида ҳеч қандай расмий маълумотлар берилмаган.
Эслатиб ўтамиз, декабрь охирларида Гулистонда икки марта кучли гумбурлаш овози эшитилганди. Кейинроқ ФВВ Сейсмопрогностик мониторинг Республика маркази бу зилзила оқибатида юзага келгани, зилзила ўчоғи ер юзасига яқин бўлгани сабабли гумбурлаш овози эшитилганини маълум қилган эди.
Таъкидлаш керакки, бу каби гумбурлаш овозлари бунга қадар Наманган вилоятида ҳам бир неча бор кузатилган эди. Хусусан, 2018 йил 6 декабрь куни Наманганда илк бор қаттиқ гумбурлаш овози эшитилганди. Ўшанда аввалига Мингбулоқ нефть конида портлаш юз бергани маълум қилинди, кейинчалик бу хабар рад этилди. 14 декабрда эса бу ҳолат яна такрорланганди. 2019 йилнинг 29 мартида Наманганда учинчи марта гумбурлаш содир бўлган. Фавқулодда вазиятлар вазирлиги ушбу гумбурлашлар табиат ҳодисаси билан боғлиқ эмаслигини маълум қилган.
Изоҳ (0)