2019-yil 29-mart kuni soat 14.30 da Namanganda kuchli gumburlash sodir bo‘ldi. Bu haqda “Daryo” muxbiri xabar bermoqda.
Avvalgilardan farqli ravishda, bu gal gumburlash faqat Namangan shahri va unga tutash hududlarda eshitildi. Guvohlar kuchli ovoz osmondan kelgani, uning ta’sirida deraza oynalari zirillab ketganini aytmoqda.
Viloyat Favqulodda vaziyatlar boshqarmasi boshlig‘i polkovnik Botirjon Ashurovga ko‘ra, navbatchilik qismlariga portlash, yong‘in, tabiat hodisasi yoki shunga o‘xshash favqulodda holatlar yuz bergani to‘g‘risida murojaatlar kelib tushmagan.
“O‘zgidromet” viloyat bo‘limi va seysmologiya xizmatlarida ham bu holat yuzasidan aniq izoh yo‘q.
Ma’lumot uchun, 2018-yil 6-dekabr kuni Namanganda ilk bor qattiq gumburlash ovozi eshitilgandi. O‘shanda avvaliga Mingbuloq neft konida portlash yuz bergani ma’lum qilindi, keyinchalik bu xabar rad etildi. 14-dekabrda esa bu holat yana takrorlangandi.
Izoh (0)