Toshkentda kuchli ta’sir qiluvchi dori vositalarining noqonuniy savdosi bilan shug‘ullanayotgan shaxslar ushlandi, deya xabar qilmoqda Ichki ishlar vazirligi matbuot xizmati.
Ma’lum qilinishicha, 2021-yilning 25-mart kuni IIV JQBB Giyohvandlik vositalari bilan qonunga xilof ravishda muomala qilishga qarshi kurashish boshqarmasi xodimlari tomonidan Toshkent viloyatining Ohangaron tumanida tezkor-qidiruv tadbiri o‘tkazilgan.
Tadbir natijasida Farg‘ona viloyati Farg‘ona tumani “Avval” QFYda yashovchi, 1993-yilda tug‘ilgan fuqaro O.S. boshqaruvida bo‘lgan Lacetti rusumli avtomashinada kelib, 4844 dona “Regapen” va 84 dona “Tropikamid” kuchli ta’sir qiluvchi dori vositalarini 6750 AQSh dollari evaziga sotayotgan vaqtida ushlandi.
Olingan ashyoviy dalillar manbasini aniqlash maqsadida O.S. bilan olib borilgan tezkor kombinatsiyalar natijasida 26-mart kuni Farg‘ona viloyati Quvasoy shahri “Bog‘bon” mahallasida yashovchi, 1993-yilda tug‘ilgan fuqaro Y.Sh., ushbu mahallada yashovchi, 1994-yilda tug‘ilgan fuqaro A.D. boshqaruvida bo‘lgan Spark rusumli avtomashinada Toshkent shahri Yangihayot tumani Sputnik-5 dahasiga yo‘lovchi sifatida kelib, 1400 dona “Regapen” va 600 dona “Tropikamid” kuchli ta’sir qiluvchi dori vositalarini 2400 AQSh dollari evaziga sotayotgan vaqtida ushlandi.
Olingan ashyoviy dalillar bo‘yicha ekspertiza tayinlangan bo‘lib, O.S., Y.Sh. va A.D. Jinoyat-protsessual kodeksning 224-moddasiga asosan ushlangan.
Ushlangan shaxslardan jami 95 765 000 so‘m miqdoridagi kuchli ta’sir qiluvchi dori vositalarining noqonuniy muomalaga kiritilishining oldi olindi.
Mazkur holat yuzasidan Toshkent shahar Yangihayot tumani bo‘yicha IIO FMB huzuridagi tergov bo‘limi tomonidan Jinoyat kodeksning 251-1-moddasi 3-qismi (uyushgan guruh tomonidan yoki ko‘p miqdorda kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilib, tergov harakatlari olib borilmoqda.
Bundan avval Farg‘onada uyida giyohvand modda saqlab kelgan shaxsga nisbatan jinoyat ishi qo‘zg‘atilgani, Andijonda giyohvand moddalarni oyoq kiyimga yashirib o‘tmoqchi bo‘lganlar qo‘lga tushgani hamda Mirzo Ulug‘bek tumanida 9,2 milliard so‘mlik qalbaki dorilarni qadoqlab sotishga uringan shaxslar qo‘lga olingani haqida xabar berilgandi.
Izoh (0)