Italiyada huquqni muhofaza qiluvchi organ xodimlari “Ndrangeta” mafiya to‘dasi a’zosini qo‘lga oldi. Mafiya a’zosi yetti yildan buyon qidiruvda edi. Bu haqda BBC nashriga tayanib “Korrespondent.net” xabar berdi.
Gumonlanuvchi o‘zining YouTube’dagi pazandalik blogi sababli fosh qilindi. Mark Feren Klod Byart Dominikan Respublikasida qo‘lga olingan. Tez orada u Italiyaga ekstraditsiya qilinadi.
So‘nggi yillarda 53 yoshli Byart Dominikan Respublikasining Boka-Chika shahrida tinch va osuda hayot kechirgan. U pazandalik blogini yuritgan, lekin yuzini oshkor qilmagan. Politsiya uni tatuirovkasidan tanib qolgan.
Ma’lumot uchun, “Ndrangeta” dunyodagi eng yirik va nomdor jinoiy to‘dalardan biri hisoblanadi. Mafiya a’zolari kokain kontrbandasida gumon qilinmoqda.
Avvalroq Italiyada huquq-tartibot xodimlari tomonidan o‘tkazilgan ikkita maxsus operatsiya davomida mamlakatdagi eng qudratli “Ndrangeta” mafiyasining jami 45 nafar a’zosi hibsga olingani haqida xabar berilgan edi. Qo‘lga olingan gumonlanuvchilar firibgarlik, tovlamachilik va iqtisodiy jinoyatlarni, xususan, “pul yuvish” operatsiyalarini amalga oshirganligi taxmin qilinmoqda. Jinoiy ish ishtirokchilariga aylangan mazkur shaxslardan jami 6 million yevro olib qo‘yilgan.
Shuningdek, Italiya huquq-tartibot idoralari Kalabriya jinoyat olami tashkilotining “Ndrangeta” mafiya guruhiga tegishli umumiy qiymati 124 million yevroga teng bo‘lgan mol-mulklarni musodara qildi. Musodara qilingan mol-mulklar orasida 4 ta kompaniya, 67 ta bino, 91 ta yer uchastkasi, 7 ta transport vositasi, 6 ta korxonaga tegishli aksiyalar, shuningdek, 20 ta bank va sug‘urta hisoblari mavjud.
Italiyaning Lametsiya-Terme shahrida 13-yanvar kuni “Ndrangeta” mafiya tashkiloti a’zolari ustidan sud jarayoni boshlandi. The Local nashrining yozishicha, sudda 355 kishi — uyushgan jinoiy guruh a’zolari, shuningdek, siyosatchilar, advokatlar, ishbilarmonlar qatnashmoqda.
Izoh (0)