OAV: Eron AQShning sanksiyalari bekor qilinmaguncha uranni boyitish darajasini tushirmaydi

Eron AQShning Tehronga qarshi sanksiyalari bekor qilinmaguncha uranni boyitish darajasini 20 foizdan tushirmasligini ma’lum qildi. Bu haqda Eronning ismi oshkor qilinmagan yuqori lavozimli amaldoriga tayanib “TASS” xabar berdi.

“Uranning 20 foizga boyitilishi yadroviy bitimning 36-bandiga mos keladi va agar AQSh barcha sanksiyalarni bekor qilsagina bu foiz pasaytiriladi”, — dedi hukumat vakili. Rasmiyning qo‘shimcha qilishicha, “AQSh prezidenti Jo Bayden ma’muriyati vaqtni behuda ketkazmoqda”. “Agar ular sanksiyalarni tez orada bekor qilmasa, Eron keyingi qadamlarni tashlaydi, bu esa Eronning yadroviy bitim bo‘yicha majburiyatlarini yanada kamaytirishni anglatadi”, — dedi u.

Politico gazetasining xabar berishicha, AQSh ma’muriyati shu hafta Eron hukumatiga Qo‘shma harakat rejasi atrofidagi vaziyatni hal qilish bo‘yicha yangi takliflarni taqdim etadi. Nashrning ta’kidlashicha, ushbu tashabbus Tehronning ilg‘or gaz sentrifugalaridan foydalanish va uranni 20 foizga boyitish kabi yadro sohasidagi ba’zi faoliyatlarni to‘xtatib qo‘yishiga javoban AQShning Eronga qarshi sanksiyalarini ma’lum darajada yumshatishni nazarda tutadi.

AQSh Davlat departamenti vakili Ned Praysning aytishicha, agar Tehron yadroviy kelishuv bo‘yicha o‘z majburiyatlariga to‘liq qaytadigan bo‘lsa, Qo‘shma Shtatlar ham shunday qiladi va so‘ng bitim parametrlarini kuchaytirishga intiladi. O‘z navbatida, Eron hukumatining rasmiy vakili Ali Rabiya AQSh bilan muloqotni boshlash uchun Tehron sanksiyalarning bekor qilinishiga ishonch hosil qilishi kerakligini ta’kidladi.

Ma’lumot uchun, 2021-yilning boshida Eron Fordodagi yadro obyektida uranni 20 foizgacha boyitish jarayonini boshladi. Mamlakat hukumati bunday urandan yiliga kamida 120 kilogramm ishlab chiqarishni rejalashtirmoqda. Tehronda qayd etishlaricha, Xalqaro yadro energetikasi agentligi allaqachon mazkur rejalar haqida xabardor qilingan.

Avvalroq Eronda yangi harbiy dengiz raketa bazasi ochilgani haqida xabar berilgandi. Ta’kidlanishicha, barcha jihozlar eronlik olimlar tomonidan ishlab chiqilgan.