Италияда ҳуқуқни муҳофаза қилувчи орган ходимлари «Ндрангета» мафия тўдаси аъзосини қўлга олди. Мафия аъзоси етти йилдан буён қидирувда эди. Бу ҳақда BBC нашрига таяниб «Korrespondent.net» хабар берди.
Гумонланувчи ўзининг YouTube’даги пазандалик блоги сабабли фош қилинди. Марк Ферен Клод Бьярт Доминикан Республикасида қўлга олинган. Тез орада у Италияга экстрадиция қилинади.
Сўнгги йилларда 53 ёшли Бьярт Доминикан Республикасининг Бока-Чика шаҳрида тинч ва осуда ҳаёт кечирган. У пазандалик блогини юритган, лекин юзини ошкор қилмаган. Полиция уни татуировкасидан таниб қолган.
Маълумот учун, «Ндрангета» дунёдаги энг йирик ва номдор жиноий тўдалардан бири ҳисобланади. Мафия аъзолари кокаин контрбандасида гумон қилинмоқда.
Аввалроқ Италияда ҳуқуқ-тартибот ходимлари томонидан ўтказилган иккита махсус операция давомида мамлакатдаги энг қудратли «Ндрангета» мафиясининг жами 45 нафар аъзоси ҳибсга олингани ҳақида хабар берилган эди. Қўлга олинган гумонланувчилар фирибгарлик, товламачилик ва иқтисодий жиноятларни, хусусан, «пул ювиш» операцияларини амалга оширганлиги тахмин қилинмоқда. Жиноий иш иштирокчиларига айланган мазкур шахслардан жами 6 миллион евро олиб қўйилган.
Шунингдек, Италия ҳуқуқ-тартибот идоралари Калабрия жиноят олами ташкилотининг «Ндрангета» мафия гуруҳига тегишли умумий қиймати 124 миллион еврога тенг бўлган мол-мулкларни мусодара қилди. Мусодара қилинган мол-мулклар орасида 4 та компания, 67 та бино, 91 та ер участкаси, 7 та транспорт воситаси, 6 та корхонага тегишли акциялар, шунингдек, 20 та банк ва суғурта ҳисоблари мавжуд.
Италиянинг Ламеция-Терме шаҳрида 13 январь куни «Ндрангета» мафия ташкилоти аъзолари устидан суд жараёни бошланди. The Local нашрининг ёзишича, судда 355 киши — уюшган жиноий гуруҳ аъзолари, шунингдек, сиёсатчилар, адвокатлар, ишбилармонлар қатнашмоқда.
Изоҳ (0)