Buyuk Britaniya qirolichasi Yelizaveta II’ning nabirasi shahzoda Garri Kaliforniyaning kouching, konsultatsiya va murabbiylik bilan shug‘ullanuvchi BetterUp kompaniyasiga ishga joylashdi, deb yozmoqda Meduza.
The Wall Street Journal’ning xabar berishicha, Garri mahsulot strategiyasini hamda xayriya faoliyatini ishlab chiqish bilan shug‘ullanadi, shuningdek, ruhiy salomatlik bilan bog‘liq mavzularda omma oldida chiqishlar qiladi.
Shahzoda Garri o‘zining ishga joylashganini tasdiqladi. “Faol murabbiylik shaxsiy rivojlanish, yangiliklardan xabardorlikni oshirish va hayotni har tomonlama takomillashtirish uchun cheksiz imkoniyatlar beradi”, — deb yozgan Garri The Wall Street Journal’ga yuborgan elektron maktubida.
BetterUp rahbari Aleksi Robishoning aytishicha, Garri direktorlik lavozimini egalladi, lekin boshqa xodimlarni boshqarmaydi. Uning so‘zlariga ko‘ra, San-Fransiskodagi ofisda ishlaydi, barcha uchrashuvlarda qatnashadi va kompaniyaning maxsus tadbirlarida chiqish qiladi.
Avvalroq Shahzoda Garri va Megan Marklning Kaliforniyadagi dala hovlisiga aynan bir qonunbuzar ikki marta Rojdestvo bayramida buzib kirgani haqida xabar berilgan edi.
Ma’lumot uchun, Britaniya shahzodasi Garri va uning rafiqasi Megan Marklning amerikalik teleboshlovchi Opra Uinfri bilan intervyusi bo‘lib o‘tdi. Ikki soatlik suhbat 7-mart kuni Amerika vaqti bilan soat 20:00 da CBS telekanalida namoyish etildi. Megan Markl va shahzoda Garri bilan bo‘lgan intervyu efirga chiqarilishidan bir necha soat oldin The Times nashri manbalariga asoslanib Bukingem saroyi tomonidan ushbu intervyuga qirol oilasiga nisbatan “urush e’lon qilish” sifatida qaralishini yozdi.
2020-yil yanvar oyida Buyuk Britaniya qirolichasi Yelizaveta II’ning nabirasi, shahzoda Garri va uning rafiqasi Megan Markl qirollik oilasining yuqori martabali a’zolari maqomi va u bilan bog‘liq imtiyozlardan voz kechishini e’lon qilgan.
Izoh (0)