Буюк Британия қироличаси Елизавета II’нинг набираси шаҳзода Гарри Калифорниянинг коучинг, консультация ва мураббийлик билан шуғулланувчи BetterUp компаниясига ишга жойлашди, деб ёзмоқда Meduza.
The Wall Street Journal’нинг хабар беришича, Гарри маҳсулот стратегиясини ҳамда хайрия фаолиятини ишлаб чиқиш билан шуғулланади, шунингдек, руҳий саломатлик билан боғлиқ мавзуларда омма олдида чиқишлар қилади.
Шаҳзода Гарри ўзининг ишга жойлашганини тасдиқлади. «Фаол мураббийлик шахсий ривожланиш, янгиликлардан хабардорликни ошириш ва ҳаётни ҳар томонлама такомиллаштириш учун чексиз имкониятлар беради», — деб ёзган Гарри The Wall Street Journal’га юборган электрон мактубида.
BetterUp раҳбари Алекси Робишонинг айтишича, Гарри директорлик лавозимини эгаллади, лекин бошқа ходимларни бошқармайди. Унинг сўзларига кўра, Сан-Францискодаги офисда ишлайди, барча учрашувларда қатнашади ва компаниянинг махсус тадбирларида чиқиш қилади.
Аввалроқ Шаҳзода Гарри ва Меган Марклнинг Калифорниядаги дала ҳовлисига айнан бир қонунбузар икки марта Рождество байрамида бузиб киргани ҳақида хабар берилган эди.
Маълумот учун, Британия шаҳзодаси Гарри ва унинг рафиқаси Меган Марклнинг америкалик телебошловчи Опра Уинфри билан интервьюси бўлиб ўтди. Икки соатлик суҳбат 7 март куни Америка вақти билан соат 20:00 да CBS телеканалида намойиш этилди. Меган Маркл ва шаҳзода Гарри билан бўлган интервью эфирга чиқарилишидан бир неча соат олдин The Times нашри манбаларига асосланиб Букингем саройи томонидан ушбу интервьюга қирол оиласига нисбатан «уруш эълон қилиш» сифатида қаралишини ёзди.
2020 йил январь ойида Буюк Британия қироличаси Елизавета II’нинг набираси, шаҳзода Гарри ва унинг рафиқаси Меган Маркл қироллик оиласининг юқори мартабали аъзолари мақоми ва у билан боғлиқ имтиёзлардан воз кечишини эълон қилган.
Изоҳ (0)