Bayden Koloradodagi otishma qurbonlari xotirasiga besh kunlik motam e’lon qildi

AQSh prezidenti Jo Bayden Koloradodagi otishma oqibatida halok bo‘lganlar xotirasiga besh kunlik motam e’lon qildi. Bu haqda Oq uy veb-saytiga tayanib “Kommersant” xabar berdi.

Xabarga ko‘ra, mamlakat bo‘ylab 22-martdan 27-mart oqshomiga qadar davlat bayroqlari tushirilgan holatda turadi.

Meduza’ning xabar berishicha, Koloradodagi otishmadan keyin Jo Bayden AQSh Kongressini mamlakatda hujum qurollarini sotishni taqiqlashga chaqirdi.

“Kelajakda odamlarning hayotini saqlab qoladigan oqil qadamlarni tashlash hamda Vakillar palatasi va Senatdagi hamkasblarimni harakatga undash uchun bir soat uyoqda tursin, bir daqiqa ham kutish shart emas. Biz mamlakatda hujum qurollari va o‘qdoni katta sig‘imli qurollarni yana taqiqlashimiz mumkin”, — dedi Bayden.

Baydenning ta’kidlashicha, AQShda 2004-yilgacha amal qilgan hujum qurollariga taqiq qirg‘inlar sonini kamaytirgan.

AQSh prezidenti senatorlarni qurol sotib olgan shaxsning o‘tmishini tekshirish tizimidagi “kamchiliklarni to‘ldiruvchi” ikkita qonun loyihasini qabul qilishga chaqirgan edi. Vakillar palatasi 11-mart kuni ushbu qonun loyihalarini qabul qilgan.

Oq uy vakili Jen Psakining aytishicha, Bayden qurolli zo‘ravonlik masalasini hal qilish bo‘yicha bir qator ijro etuvchi choralarni ko‘rib chiqmoqda. Ta’kidlanishicha, ushbu holatda Kongress tomonidan mazkur harakatlarning ma’qullanishi shart emas.

So‘nggi bir hafta ichida Qo‘shma Shtatlarda ko‘plab qurbonlarga sabab bo‘lgan ikkita otishma sodir bo‘ldi. 22-mart kuni Kolorado shtatining Boulder shahridagi supermarketda 21 yoshli Ahmat Alissa otishma sodir etgan, oqibatda 10 kishi, shu jumladan, bir nafar politsiya xodimi halok bo‘lgan. Rasmiy ma’lumotlarga ko‘ra, gumondor otishmadan olti kun oldin hujum qurolini sotib olgan.

Shuningdek, 16-mart kuni Jorjiyada 21 yoshli Robert Aaron Long tomonidan Atlanta chekkasidagi massaj salonlariga qilingan qurolli hujumlarda sakkiz kishi, jumladan, olti osiyolik ayol o‘ldirilgan.

Avvalroq Jo Bayden AQSh Kongressiga qurol sotishga oid shartlarni murakkablashtirishni taklif qilgani haqida xabar berilgandi.