Polshada yozuvchi Yakub Julchik Facebook ijtimoiy tarmog‘iga joylagan postida mamlakat prezidenti Anjey Dudani “esi past” deb ataganlikda ayblanmoqda, deb yozadi Meduza.
Ayblov hukumat vakilini haqorat qilish moddasi bo‘yicha qo‘yilgan bo‘lib, unda uch yilgacha ozodlikdan mahrum qilish nazarda tutiladi.
Ta’kidlanishicha, 2020-yil 7-noyabr kuni, AQShdagi prezidentlik saylovidan uch kun o‘tib Duda Twitter’da Jo Baydenni “muvaffaqiyatli kampaniyasi” bilan tabriklagan. U Baydenning saylovdagi g‘alabasini qayd etmagan, buni natijalar hali rasmiylashtirilmagani va “saylovchilar kollegiyasining tasdqig‘ini” kutayotgani bilan izohlagan.
Yozuvchi Julchik bu haqda o‘zining Facebook sahifasida izoh berib, azaldan AQShdagi siyosat bilan qiziqishini, ammo “saylovchilar kollegiyasining tasdig‘i” kabi hodisa haqida bilmasligini ta’kidlagan. “Jo Bayden — AQShning 46-prezidenti, Duda — esi past”, deb qo‘shimcha qilgan yozuvchi.
Ushbu posti uchun so‘roqqa tortilgan Julchik prezidentni haqorat qilgani to‘g‘risidagi ayblovga iqror bo‘lishdan bosh tortdi. Yozuvchining so‘zlariga ko‘ra, uning harakatlari prezidentga tanqidiy bahodir.
Ma’lumot uchun, Yevropa davlatlari ichida Polsha mamlakat rahbarlari, davlat ramzlari va diniga qarshi jamoatchilik oldida fikr bildirish to‘g‘risida eng og‘ir qonunlarni qabul qilgan. Ushbu qonunlar uchun Varshava xalqaro tashkilotlar tomonidan muntazam tanqid qilib kelinadi.
Izoh (0)