Farg‘onadagi savdo va xizmat ko‘rsatish binolarining o‘zboshimchalik bilan qurilgan yuqori qavatlari buzilishi mumkin

Farg‘onadagi savdo va xizmat ko‘rsatish binolarining o‘zboshimchalik bilan qurilgan yuqori qavatlari buzilishi mumkin, deya xabar berdi “Daryo” muxbiri Azizjon Ermatov.

Qayd etilishicha, viloyat prokuraturasi mutaxassislar ishtirokida olib borilayotgan o‘rganishlarda jismoniy va yuridik shaxslar tomonidan 2 ta holatda loyiha hujjatlaridan chiqib, o‘zboshimchalik bilan tegishli ruxsatnomasiz qo‘shimcha qavatlar qurilayotganligi, 3 ta holatda qurilish sohasidagi hududiy nazorat inspeksiyasiga xabarnoma berilmagan holda ruxsatnomasiz bino inshootlar qurilganligi va 3 ta holatda loyiha hujjatlaridan chetga chiqib ikki qavatli savdo va xizmat ko‘rsatish binosi ustiga mansarda qismi qo‘shib qurilganligi aniqlangan.

Jumladan, “Vodiy omad nuri plyus” MChJ tomonidan Farg‘ona shahar, Sayilgoh ko‘chasida tasdiqlangan loyiha hujjatlariga asosan 4 qavatli turar joy binosi qurish uchun ruxsatnoma olingani holda amalda o‘zboshimchalik bilan 5 qavatli turar joy binosi qurilib, shaharsozlik qoidalari buzilgan.

Fuqaro K.M. tomonidan Farg‘ona shahar, Qomus ko‘chasida 5 qavatli savdo va xizmat ko‘rsatish binosi qurish uchun ruxsatnoma olinib, tegishli shaharsozlik hujjatlari rasmiylashtirilmasdan qo‘shimcha 6-qavat qurilgan.

Shuningdek, fuqaro Z.A. tomonidan Farg‘ona shahar, Yangi asr ko‘chasida qurilish nazorat inspeksiyasiga xabar berilmagan holda tegishli ruxsatnomasiz 2 qavatli ustida mansarda bo‘lgan savdo va xizmat ko‘rsatish binosi qurilganligi aniqlangan.

Bundan tashqari, “Farg‘ona Hanifa nur” MChJ tomonidan to‘rt qavatli turar joy binosi hamda fuqaro N.T. tomonidan 2 qavatli savdo va maishiy xizmat ko‘rsatish binosi qurilishida ham ruxsatnomasiz qurilish olib borish holatini kuzatish mumkin.

O‘rganishlar davomida “Oybek sanatoriysi” MChJ va fuqarolar F.A. va A.S. tomonidan tegishli hujjatlar rasmiylashtirilmasdan bino ustiga mansard qismi qo‘shib qurilgani ma’lum bo‘ldi.

Ushbu qonun buzilishi holatlari yuzasidan Farg‘ona viloyat qurilish nazorat inspeksiyasi tomonidan ma’muriy huquqbuzarlik to‘g‘risidagi hujjatlar rasmiylashtirilib, ko‘rib chiqish uchun sudga yuborilgan. Jismoniy va yuridik shaxslarga qurilish ishlarini to‘xtatish va aniqlangan kamchiliklarni bartaraf etish yuzasidan yozma ko‘rsatmalar berilgan.