Xorazm va Jizzaxda fuqarolarga yer olib berishni va’da qilib, ulardan pul undirishni maqsad qilgan shaxslar ushlandi, deya xabar qilmoqda Bosh prokuratura huzuridagi Departament.
Qayd etilishicha, Bosh prokuratura huzuridagi Departamentning Hazorasp tuman bo‘limi tomonidan tezkor tadbir o‘tkazilgan.
Tadbir davomida fuqaro V.R. va U.R. oldindan til biriktirib, fuqaro O.ga turar joy binosini qurish uchun tuman hokimligi zaxirasidan 1200 kvadrat metr yer maydonini yuqori lavozimda ishlovchi tanishlari orqali olib berish evaziga 5000 AQSh dollarini olgan vaqtida ashyoviy dalillar bilan ushlangan.
Yana bir holat Departament hamda DXXning Jizzax viloyati boshqarmalari tomonidan o‘tkazilgan tezkor tadbirda aniqlandi.
G‘allaorol tumani “O.” suv iste’molchilari uyushmasi raisi F.T. yer sotishga vakolati bo‘lmasa-da, fuqaro I.ning ishonchiga kirib, unga uyushma hududidan g‘allachilikka ixtisoslashgan 3 gektar suvli hamda 20 gektar lalmi yer maydonlarini firibgarlik yo‘li bilan sotishni rejalashtirib, oldindan kelishilgan 50 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan avval o‘zini mahalla raisi sifatida tanishtirib, Sergelidan imtiyozli narxlarda uy olib berishni va’da qilgan shaxsga jinoyat ishi qo‘zg‘atilgani, Termizda 3 ming dollar evaziga ikki kishini harbiy qismga ishga joylashtirib qo‘ymoqchi bo‘lgan shaxs ushlangani hamda Toshkentda 4 ming dollar evaziga Milliy gvardiya tizimiga ishga kiritib qo‘yishni va’da qilgan shaxs qo‘lga olingani haqida xabar berilgandi.
Izoh (0)