Тошкент шаҳри Яккасарой туманида жойлашган Бобур кўчасидаги 7-уй Моддий маданий мерос объектлари рўйхатига киритилди. Бу ҳақда Вазирлар Маҳкамасининг 2021 йил 3 мартдаги 119-сонли қарорида сўз боради.
Шунингдек, Шайхонтоҳур тумани Қозиробод кўчасида жойлашган «Камолон» маҳалласидаги 1885 йилда қурилган авлиё Георгий ибодатхонаси ҳам архитектура ёдгорлиги реестрига киритилган. Бундан ташқари, 1930 йилда қурилган Яккасарой тумани ҳокимлиги биноси (собиқ Пойабзалчилар санъат саройи) ҳам рўйхатдан ўрин олган.
Шу йилнинг февраль бошида Тошкент туманлараро маъмурий суди Тошкент шаҳрининг собиқ ҳокими Абдуқаҳҳор Тўхтаевнинг Яккасарой тумани Бобур кўчаси 7-уйни маданий мерос объектлари давлат рўйхатидан чиқаришга оид буйруғини ҳақиқий эмас деб топганди.
Уйда маданий ёдгорлик мақоми бўлмагани сабаб Тошкентнинг амалдаги ҳокими Жаҳонгир Ортиқхўжаев 2018 йил 13 октябрдаги 1550-сонли қарори билан ер участкасини Universal Packing Masters компаниясига «снос» ва янги кўп қаватли турар жой биноси қуриш учун топширган. Кейинроқ тадбиркор Мурод Назаров ўша йили уч томонлама шартномага биноан қурилиш ҳуқуқи Jemchug House’га берилган.
Эслатиб ўтамиз, 2007 йилга қадар маданий ёдгорликлар рўйхатида бўлган 7-уй Тошкент шаҳрининг собиқ ҳокими Абдуқаҳҳор Тўхтаев буйруғи билан ундан чиқариб ташланган. Орадан 11 йил ўтгач, қурувчилар аҳолини уйдан кўчиришни бошлаган. Бироқ уйда истиқомат қиладиган фуқароларнинг бир қисми уйни яна маданий мерос объектига айлантиришга муваффақ бўлган. 2020 йил апрелда маданият вазири томонидан тасдиқланган хулосада «Тошкент шаҳри Бобур кўчасидаги 7-уй меъморий ёдгорлик сифатида сақлаб қолинади» дейилган.
Изоҳ (0)