Buyuk Britaniya poytaxti London Nyu-Yorkni ortda qoldirib, dunyodagi eng ko‘p dollar millionerlari bor shaharga aylandi. Shu bilan birga, London kambag‘allikda yashaydigan oilalar soni bo‘yicha mamlakatda yetakchi hisoblanadi. Bu haqda The Guardian xabar berdi.
Ma’lum qilinishicha, 874 354 nafar londonlik dollar millionerlari hisoblanadi. Bu Britaniya poytaxtidagi har o‘ninchi odamning 1 million dollar va undan ko‘p puli bor deganidir.
Reytingning ikkinchi pog‘onasida Nyu-York joylashgan bo‘lib, u erda 820 ming kishi bir million dollardan ortiq boylikka ega.
Buyuk Britaniyaning Mehnat va pensiya vazirligining ma’lumotlariga ko‘ra, London kam ta’minlangan oilalar soni bo‘yicha mamlakatning qolgan hududlarini ortda qoldiradi. Poytaxt aholisining 28 foizi kambag‘al deb tasniflanadi. Mamlakatda kambag‘allar aholining o‘rtacha 22 foizini tashkil qiladi.
Bundan avval Rossiyada o‘ta boy odamlar bir yilda ming kishiga kamaygani, tadqiqotlarga ko‘ra dunyodagi eng boy odamlar 3 yil ichida pandemiya oqibatlarini bartaraf etishlari mumkinligi hamda Ilon Mask 15 milliard dollar boyligini yo‘qotib, dunyoning eng boy odami maqomidan ayrilgani haqida xabar berilgandi.
Izoh (0)