Dubay malikasi Latifa bin Muhammad al-Maktum Britaniya politsiyasidan 20 yil avval katta singlisining Kembrijdan o‘g‘irlab ketilishi yuzasidan qayta tekshiruv o‘tkazishni so‘rab xat yozdi. Bu haqda BBC News xabar berdi.
Xatda Latifa Kembrij politsiyasidan tergovni qayta boshlashni va otasining buyrug‘i bilan qo‘lga olingan malika Shamsani ozod qilishga yordam berishni so‘raydi. Do‘stlari tomonidan Kembrij politsiyasiga topshirilgan malikaning qo‘lyozma xatida u Britaniya hukumatini choralar ko‘rish va singlisini himoya qilishga chaqiradi. Xat 2019-yilda, malika villada qamoqda bo‘lganida yozilgan.
“Sizdan birdan bir narsani so‘rayman, — deb yozadi Latifa, — iltimos, singlimning ishiga e’tiboringizni qarating ... yordamingiz va e’tiboringiz uni ozod qilishi mumkin”.
2019-yilda Angliya va Uels Oliy sudi tomonidan Dubay amiri Muhammad bin Rashid al-Maktum ikkala qizini ham o‘g‘irlab, ularni o‘z xohishlariga qarshi ushlab turibdi, deb topilgan.
BBC o‘tgan hafta Latifaning eski videomurojaatini tarqatgan. Unda Latifa 2018-yildagi mamlakatdan qochishga urinishi muvaffaqiyatsiz tugagandan so‘ng o‘zini villada majburan ushlab turilgani haqida ma’lum qilgan.
Videomurojaat tarqalganidan beri BMT Birlashgan Arab Amirliklaridan malika tirik ekani haqida dalillarni taqdim etishni talab qilmoqda.
2000-yil avgust oyida, Angliyaning Surrey grafligidagi otasining Longkross mulkidan qochganidan taxminan ikki oy o‘tgach, Latifaning katta singlisi Shamsa Kembrijdan zo‘rlik bilan olib ketilib, vertolyotda Fransiyaga yetkazilgan, keyin esa shaxsiy samolyotda Dubayga keltirilgan. Shamsa 18 yoshida o‘g‘irlab ketilgan va o‘shandan beri uni hech qayerda ko‘rishmagan. Ayni paytda ayol 39 yoshda bo‘lishi kerak. Dubay hukumati BBC News’ning izoh so‘rab yuborgan savollariga javob bermadi.
Malika Latifa bin Muhammad ibn Rashid al-Maktum — Dubay hukmdori, Birlashgan Arab Amirliklarining bosh vaziri shayx Muhammad ibn Rashid al-Maktum va Jazoirlik Xuriya Ahmed al-Maashning qizi. 2018-yil fevral oyi oxirida u yaxtada Hind okeani orqali qochishni rejalashtirgan. Biroq yaxta Hindiston dengiz kuchlari va BAA maxsus xizmat vakillari tomonidan qo‘lga olinib, malika Dubayga olib ketilgan.
BAAdan qochishdan avval malika YouTube’ga o‘zi va opa-singillari haqida, ular nega mamlakatdan qochib ketmoqchi bo‘lganliklari hamda BAAda ayollarga nisbatan qanday munosabatda bo‘lishlari haqida hikoya qilingan videorolikni joylagandi.
Malika Latifaning otasi dunyodagi eng boy hukmdorlardan biri hisoblanadi, u Dubay amirligining hukmdori va BAA vitse-prezidenti.
Izoh (0)