McDonald’s korporatsiyasi eng kam ish haqini soatiga 15 dollarga ko‘tarish tarafdori bo‘lgan ishchilarning ma’lumotini yig‘uvchi maxsus maxfiy razvedka bo‘linmasini tashkil qildi. Rahbarlar bunday xodimlarni kompaniyaning xavfsizligiga tahdid deb biladi va shuning uchun bir necha yillardan buyon ularning orqasidan josuslik qilib keladi, deb yozmoqda Vice nashri olib borilgan tergov natijalariga asoslanib.
McDonald’s ishchilarining o‘z kasaba uyushmasi yo‘q, ammo ularning ko‘pchiligi 2012-yildan beri AQSh va boshqa mamlakatlarda tez tayyorlanuvchi ovqat ishlab chiqaruvchilari ishchilarining 15 dollar uchun kurash (Fight for $15) deb nomlangan harakatida ishtirok etadi. Harakat Amerika ma’muriyati va biznesmenlaridan 10 yildan ortiq vaqt davomida o‘zgarmay kelayotgan ish haqi — soatiga 7,25 dollarni oshirishni so‘ramoqda.
Vice nashrining ta’kidlashicha, harakat sabab AQSh Kongressi soatiga 15 dollar miqdorida federal eng kam ish haqini tasdiqlashi mumkin. Bir qator shtatlarda, xususan, Kaliforniya, Nyu-York, Massachusets, Illinoys va Merilendda mahalliy hokimiyat bu talablarni qondirdi.
Shu bilan birga, harakatning ko‘plab faollari McDonald’s franshizalarida ishlaydi, shuning uchun kompaniyaning o‘zi ular rasmiy ravishda uning xodimlari emasligini aytib, ular bilan muzokaralar olib borishdan bosh tortmoqda.
Shunga qaramay, Chikago va Londondagi ofislarda joylashgan razvedka bo‘yicha tahlilchilar guruhi butun dunyo bo‘ylab 15 dollar uchun kurash harakatini kuzatmoqda. Razvedka McDonald’s kompaniyasining qaysi xodimlari harakat faollari ekanligini, ish tashlashlar va norozilik namoyishlari uyushtirishi yoki mahalliy kasaba uyushmalarini tashkil etish uchun harakat qilishini aniqlaydi.
Nashrdagi hujjatlarga ko‘ra, McDonald’s maxfiy bo‘linmasining maqsadi — kompaniyaning “kontragentlari” va biznesning jiddiy ravishda buzilishiga olib keladigan hamda investitsiyalarning rentabelligiga ta’sir qilishi mumkin bo‘lgan murakkab bozorlardagi qiyin siyosiy sharoitlar to‘g‘risida siyosiy ma’lumotlarni to‘plash.
Bundan tashqari, kompaniya “qanday qilib va qayerda 15 dollar uchun kurash (McDonald’s) brendga xavf tug‘dirishi” yoki “15 dollar uchun kurash 2020-yilgi maqsadlarini qanday amalga oshirayotganini” kuzatib boradi.
“Ularning maqsadi faollarning strategiyasini aniqlash, unga qarshi tura olish va asosiy o‘yinchilar qayerda ekanligini hamda yana kimlar bu haqda bilishini aniqlash”, — deydi korporatsiyaning sobiq xodimi.
Mavzuga doir: Amerikalik ayol uy sharoitida qanday qilib McDonald’s gamburgeri tayyorlashni ko‘rsatdi
Biroq McDonald’s vakili kompaniya faoliyat yuritayotgan dunyoning 40 mingga yaqin joylarida jamoaga, franchayzingchilarga va mijozlarga zarar yetkazishi mumkin bo‘lgan har qanday xavfsizlik tahdidlarini aniqlashga yo‘naltirilgan guruh borligini inkor etmadi.
“Biz kompaniya ishiga xalaqit berishni maqsad qilgan xodimlarning norozilik harakatlarini kuzatib borishga majburmiz, bu xodimlar va mijozlarning xavfsizligiga zarar yetkazishi mumkin”, — deya qo‘shimcha qildi korporatsiya vakili.
Bundan avval McDonald’s besh yil ichida birinchi marta qadoqlar dizaynini o‘zgartirishi haqida xabar berilgandi.
Izoh (0)