Avstraliyada qabul qilingan yangi qonunga ko‘ra, Facebook va Google singari raqamli platformalar o‘z kontentlarida yangiliklarni ulashishi uchun mahalliy ommaviy axborot vositalari va noshirlar bilan bitim tuzishi yoki ularga pul to‘lashi kerak. Bu haqda CNBC nashri xabar berdi.
Raqamli platformalar to‘lashi kerak bo‘lgan mablag‘ miqdori hech qanday mustaqil tijoriy shartnoma tuzilmaslik sharti bilan Avstraliya hukumati tayinlagan hakam tomonidan hal qilinadi.
Facebook bilan kelib chiqqan ziddiyatlar tufayli qabul qilinish oldidan qonunga tuzatishlar kiritildi. O‘zgartirishlarga ko‘ra, davlat tomonidan tayinlangan hakamning aralashuvidan oldin, ikki oy mobaynida platforma va mediakompaniya noshirlarining o‘zlari shartnoma tuzishi mumkin.
“Parlament hukumat tomonidan taklif qilingan majburiy muzokaralar kodeksini tasdiqladi, bu yangiliklar bo‘yicha OAV va raqamli platformalar o‘rtasidagi kelishmovchiliklarni bartaraf etishga imkon beradi. Natijada axborot mediakompaniyalari o‘zlari yaratgan kontentlar uchun munosib mukofotlanadi”, — deyiladi xabarda.
Eslatib o‘tamiz, 18-fevral kuni Facebook ijtimoiy tarmog‘i avstraliyalik foydalanuvchilar va ommaviy axborot vositalarini tarmoqda mahalliy va xalqaro yangiliklarni ulashish imkoniyatidan mahrum qilgan edi. Bunga qabul qilinishi kutilayotgan qonun sababchi bo‘lgan, unga ko‘ra, yangiliklar ulashilgan taqdirda Facebook, Google va boshqa platformalar o‘z kontentlari uchun OAVga pul to‘lashi kerak.
23-fevral kuni esa Facebook va Avstraliya rahbarlari mamlakatda ijtimoiy tarmoqning to‘liq faoliyatini tiklash bo‘yicha kelishuvga erishdi.
Avvalroq Facebook ijtimoiy tarmog‘i siyosiy reklama taqiqlangani sababli koronavirusga qarshi emlashning afzalliklari to‘g‘risidagi pullik postlarni bloklayotgani haqida xabar berilgandi. Xabarga ko‘ra, ijtimoiy tarmoq algoritmlari emlash markazlari, shuningdek, vaksinaning ta’sir mexanizmlari to‘g‘risidagi pullik postlarni tarmoqdan olib tashlaydi. Bunday postlar kamida 110 ta guruhda bloklangan — mazkur holat algoritmlarning bu kabi reklamalarni siyosiy deb hisoblashi bilan bog‘liq.
Izoh (0)