Toshkent shahridagi Yangihayot tumani hududida joylashgan 400 dan ziyod ikki qavatli yog‘och uylar buziladi va ularda yashovchi 4 mingdan ziyod xonadon tuman markazida quriladigan yangi uylarga ko‘chiriladi. Bu haqda AOKAda o‘tkazilgan matbuot anjumanida tuman hokimi Hayot Inog‘omov ma’lum qildi.
“Tuman markazida 149 gektar hududda xavfsizlik talablariga javob bermaydigan ikki qavatli yog‘och uylar bor. Bular 1966-yildagi voqealar vaqtida tez fursatda qurilgan uylar, hozirgi kunga kelib ko‘pchiligi avariya holatiga kelib qolgan.
Biz turkiyalik mutaxassislar bilan hamkorlikda loyiha ishlab chiqyapmiz, hozir yer tanlash jarayoni ketmoqda, yer tanlangach shu yerga uylar qurib, aholini yangi uylarga ko‘chiramiz. Hamma kommunikatsiyasi, sharoiti bor uylarga ko‘chiriladi, sharoitini yaxshilab beramiz.
Loyiha doirasida ushbu bosqichda jami 409 ta avariya holatidagi uylarni buzib ulardagi 4314 ta xonadonda yashayotgan mulkdorlar uchun tuman markazidan yangi zamonaviy uylar qurish rejalashtirilgan.
Yangi quriladigan uylar va unda yashaydigan aholi soniga mos ravishda maktab, MTT, sport, madaniyat muassasalari qurish rejamiz bor”, – dedi Yangihayot tumani hokimi Hayot Inog‘omov.
Ma’lumot uchun, Yangihayot tumani hududi 4 419,6 gektarni tashkil etadi va unda 150 mingga yaqin aholi yashaydi.
Eslatib o‘tamiz, tuman 2020-yil 12-noyabr kuni tashkil etilgan. 16-noyabr kuni esa tumanga hokim, prokuror va IIB boshlig‘i tasdiqlangan.
Izoh (0)