AQShning xalqaro ta’lim dasturlarini targ‘ib qilishga ixtisoslashgan American Councils tashkiloti O‘zbekistonga mingga yaqin o‘qituvchilarni yuborishni rejalashtirmoqda. Bu haqda Xalqaro ta’lim bo‘yicha Amerika Kengashlarining katta vitse-prezidenti Maykl Kertis O‘zbekistonning Vashingtondagi diplomatik vakolatxona rahbari Javlon Vahobov bilan o‘tkazgan muzokaralarda ma’lum qilgan.
“Xalq so‘zi online” O‘zbekistonning AQShdagi elchixonasiga tayanib xabar berishicha, uchrashuv davomida tomonlar tashkilotning O‘zbekistondagi ta’lim dasturlarini amalga oshirish bo‘yicha joriy faoliyatini, mamlakatdagi ta’lim loyihalarini amalga oshirishning istiqbolli yo‘nalishlarini, shuningdek, Respublikada ingliz tilini o‘qitish sifatini oshirishga American Councils’ni jalb etishni muhokama qilgan.
Javlon Vahobov O‘zbekiston bo‘ylab maktab va universitetlarda dars berish uchun AQShdan 27 nafar ingliz tili o‘qituvchisi va olimlardan iborat dastlabki guruh yuborilgani uchun minnatdorchilik bildirgan.
Maykl Kertis faol hamkorlik uchun o‘z minnatdorchiligini bildirgan va American Councils O‘zbekistonning mamlakatdagi kadrlar salohiyatini va yosh avlod bilimlarini sifat jihatidan oshirishga qaratilgan sa’y-harakatlarini qo‘llab-quvvatlashga tayyor ekanligini ta’kidlagan. Uning aytishicha, O‘zbekistonga qo‘shimcha ravishda mingga yaqin o‘qituvchilar yuborilishi rejalashtirilgan.
Bundan tashqari, ayni paytda O‘zbekistonda AQSh hukumati tomonidan moliyalashtiriladigan o‘ndan ortiq ta’lim dasturlari amalga oshirish bosqichida turibdi. Ular orasida Future Leaders Exchange, University Partnership in Central Asia, English Speaking Nation, ESN Teacher Coaches Program, U.S. Central Asia Education Fund, US-CAEF Alumni Conference 2021, American Windows Uzbekistan, Faculty Enrichment Program, Young Professional Internships, Uzbekistan Business Leaders, Afghanistan University Student Exchange Program, Open World Leadership Center Program, Uzbekistan Youth Leadership Conference 2021 kabilar bor.
O‘zbekistonda English Speaking Nation dasturi o‘tgan yilning mart oyida ishga tushirilgan edi. Uch yil davomida 15 mingdan ortiq o‘qituvchilar treningdan o‘tadi.
Xabarda aytilishicha, muzokaralar yakuni bo‘yicha tomonlar 2021—2022-yillarda O‘zbekiston fuqarolari uchun ta’lim loyihalari sohasida grant ko‘magini oshirish, 2022-yil oxirigacha respublika hududida ta’lim yarmarkasini tashkil etish kabi ikki tomonlama hamkorlikni kengaytirishga kelishib oldi. AQShning yetakchi universitetlarini jalb qilgan holda ingliz tili (TOEFL) va boshqalarni bilish bo‘yicha test markazlarini kengaytirish rejalashtirilgan.
American Councils — AQShning notijorat tashkiloti bo‘lib, madaniy almashinuv, til tayyorgarligi va professional rivojlanishni oshirish orqali xalqaro ta’lim dasturlarini targ‘ib qilishga ixtisoslashgan. Tashkilot dunyoning 90 mamlakatida loyihalarni amalga oshiradi. Bugungi kunga qadar 94 mingdan ortiq bitiruvchilar, jumladan, milliy yetakchilar, vazirlar, parlament a’zolari, elchilar va yetakchi kompaniya va korxona rahbarlari American Councils’ning ta’lim dasturlarida muvaffaqiyatli ishtirok etgan.
Ushbu nodavlat tashkilot 2018-yilda o‘z ishini O‘zbekistonda davom ettirdi va hozirgi kunda mamlakatda ta’limni rivojlantirish bo‘yicha umumiy qiymati 50 million dollarlik grant shartnomasini amalga oshirishda ishtirok etmoqda.
Izoh (0)