Namanganda sobiq “Samarqand” sovxozi hududida joylashgan chiqindi poligoni yopildi. Bu haqda “Daryo” muxbiri Azizbek Abduvaliyev xabar bermoqda.
1989-yildan beri faoliyat yuritib kelgan poligon 13 gektar maydonni egallagan. Oldinlari Namangan tumani tarkibida bo‘lgan hudud keyinchalik Namangan shahriga o‘tgan va yon-atrofida xonadonlar qurilib, “Mustaqillikning 5 yilligi” mahallasiga asos solingan. Mahalliy aholi chiqindixonaga yaqinlik va bu yerda tarqalayotgan badbo‘y hidlardan aziyat chekib kelayotgandi.
“Hozirda poligonga chiqindi olib kelish to‘xtatilgan. Hududga tuproq to‘kilib, rekultivatsiya ishlari olib borilmoqda. Keyinchalik bu yerdan turli maqsadlarda foydalanish, manzarali daraxtlar ekib, obodonlashtirish va ko‘kalamzorlashtirish mumkin”, — deydi Respublika ixtisoslashtirilgan korxonalar birlashmasi poligonlar bo‘limi boshlig‘i Tohir Nurboyev.
Nurboyevning aytishicha, viloyatning To‘raqo‘rg‘on tumanida, aholidan chekka hududda yangi poligon ishga tushirilmoqda. Bu yerda keyinchalik chiqindilarni qayta ishlaydigan zavod ham barpo etiladi.
Ma’lumot uchun, Namanganda aholini maishiy chiqindilarni tashish xizmati bilan 100 foiz qamrab olish, chiqindilarni qayta ishlash darajasini esa hozirgi 13 foizdan joriy yil yakunida 38 foizgacha yetkazish rejalashtirilmoqda.
Izoh (0)