Yangihayot tumani Xalq deputatlari Kengashining navbatdan tashqari sessiyasi 16-noyabr kuni bo‘lib o‘tdi, deya xabar bermoqda Toshkent shahar hokimligi.

Foto: “Daryo”

Sessiyada Yangihayot tumani hokimini tasdiqlash to‘g‘risidagi masala ko‘rib chiqildi. Deputatlar tomonidan ushbu lavozimga tavsiya etilgan Hayot Inog‘omov nomzodi bir ovozdan ma’qullandi.

Hayot Inog‘omov 1986-yilda Toshkent shahrida tug‘ilgan. 2008-yilda Toshkent avtomobil yo‘llari institutini tamomlagan.

Shu paytga qadar Toshkent shahar hokimining o‘rinbosari – Toshkent shahar kanallardan foydalanish va ularga tutash hududlarni obodonlashtirish boshqarmasi boshlig‘i vazifasida ishlagan. Hayot Inog‘omovni ushbu tumanga hokim etib tayinlashni Shavkat Mirziyoyev taklif qilgan edi.

Yangihayot tumani Xalq deputatlari Kengashining navbatdan tashqari sessiyasida tuman prokurori va Ichki ishlar bo‘limi boshlig‘ini tasdiqlash masalasi ham ko‘rib chiqildi.

Foto: Toshkent shahar hokimligi

Yangihayot tumani prokurori lavozimiga Azamat Azimov, Ichki ishlar bo‘limi boshlig‘i lavozimiga esa Murod Raimov tasdiqlandi.

Ma’lumot uchun, Prezident Shavkat Mirziyoyevning 2020-yil 11-noyabr kungi PQ-4888-son qarori bilan Toshkent shahri tarkibida Yangihayot tumani hokimligi tashkil etildi. Tuman maydoni poytaxt va Toshkent viloyatidagi 6 tuman hududi hisobiga kengaytirilgan.