Xalq ta’lim vaziri Sherzod Shermatov endilikda developerlarga har bir yangi quriladigan xonadon uchun taxminan 1,5 o‘quvchi o‘rnini hisobga olib, davlat maktabi qurib berish vazifasi yuklanganini ma’lum qildi. Shunda tijorat maqsadlarida 1000 ta kvartirali kompleks qurilsa, 1500 o‘rinli davlat maktabi ham qurib topshiriladi.
Xalq ta’limi vazirining yozishicha, o‘tgan yili Mirzo Ulug‘bek tumanidagi Temur Malik va Do‘rmon yo‘llari kesishmasidagi uy-joy komplekslariga Prezident tashrifi vaqtida yangi kompleksga maktab zarurligi sababli, quruvchi kompaniya tomonidan davlat maktabi ham qurib berilishi aytilgan. Hozirgi kunda esa yangi 990 o‘rinli zamonaviy maktab bitmoqda.
Ta’kidlanishicha, davlat dasturi muhokamasidagi videoselektorda ushbu ijobiy tajribani barcha hududlardagi yangi qurilayotgan uy-joy komplekslariga keng joriy etish bo‘yicha O‘zbekiston Prezidenti tomonidan hududlar rahbarlariga qo‘shimcha topshiriq bo‘lgan. Ya’ni har bir yangi quriladigan xonadonga taxminan 1,5 o‘quvchi o‘rnini hisobini olib, davlat maktabi qurib berish kerak bo‘ladi. Shunda tijorat maqsadlarida 1000 ta kvartirali kompleks qurilsa, 1500 o‘rinli davlat maktabi ham qurib topshiriladi.
“Bir tomondan, boshida quruvchi kompaniyaning xarajatlari ko‘paygandek ko‘rinsa-da, kelgusida kompaniya ushbu uylardagi aholi yaxshi maktabga yayov chiqa olishini inobatga olib yangi kvartiralarini boshqa joydagi kvartiralarga nisbatan yaxshiroq narxga sota oladi va xarajatlarini qoplab ketadi.
Bu esa o‘z navbatida maktablarga ajratilayotgan investitsiya dasturidagi mavjud mablag‘lar doirasida uzoqroq hududlardagi ko‘proq maktablarni kapital ta’mirlashga imkoniyat beradi. Chunki viloyat markazida 1 ta yangi maktab qurishga ketadigan xarajat hisobiga tumanlarda kamida 10—15 ta maktabni zo‘r qilib kapital ta’mirlasa bo‘ladi”, — deyiladi xabarda.
Sherzod Shermatov OAV va jamoatchilik vakillarini ushbu yaxshi tajribani bemalol joyiga borib ko‘rishga, quruvchi va developer kompaniyalar orasida kengroq tarqatishga, joylardagi boshqa yangi qurilishlarda ham nazoratga olishda yordam berishga chaqirgan.
Eslatib o‘tamiz, 2020-yil oxirida Shavkat Mirziyoyev “2021–2023-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi qarorni imzolagan edi. Mazkur qarorga ko‘ra, mamlakatda yana 22 ta bog‘cha, 31 ta maktab va 16 ta OTM qurilishi belgilangan.
Izoh (0)