Umumta’lim maktablarida o‘qituvchilarning soni va ular berayotgan ta’lim sifati tahlil qilinganida maktablar ta’lim beradigan emas, ish beradigan muassasaga aylanib qolgan, degan xulosaga kelingan. Bu haqda 16-yanvar kuni xalq ta’limi vaziri Sherzod Shermatov “Ta’lim to‘g‘risida”gi qonunning umumiy o‘rta ta’limga oid qismi ijrosi yuzasidan Oliy Majlis Senatiga bergan axborotida ma’lum qildi.

Sherzod Shermatov

Foto: O‘zbekiston Respublikasi Oliy Majlis Senati

“Ayrim umumta’lim maktablarining boshlang‘ich ta’limida bir stavkalik ish o‘rnida 3-4 nafar o‘qituvchi dars berayotgani aniqlangan. Qoida bo‘yicha bir stavkada bir nafar o‘qituvchi dars berishi kerak. Sifat tarkibini tahlil qilsak, birinchi toifa to‘liq stavkada ishlayapti, lekin toifasiz va o‘rta maxsusni qaraydigan bo‘lsak, bitta stavkaga ikki-uchtagacha o‘qituvchi ishlab kelmoqda”, – dedi Sherzod Shermatov.

Vazirning aytishicha, maktablarga o‘qituvchi olishda ko‘proq oliy toifali mutaxassislarni jalb etish va ularning sonini ko‘paytirish vazifasi qo‘yilgan.

Endilikda o‘qituvchi maktabga ishga joylashish uchun maktab ma’muriyati yoki boshqa mutasaddilarga murojaat qilmaydi. Ya’ni buning uchun onlayn platforma yaratilgan bo‘lib, unga bo‘sh (vakant) joy uchun ariza topshiradi va tegishli tartibda ko‘rib chiqilganidan so‘ng ishga qabul qilinadi. Bu esa tizimda shaffoflikni ta’minlaydi va turli xil byurokratik to‘siqlarni kamaytiradi.

Tadbirda ta’lim sifati past bo‘lgan hududlar ham e’tiborga olinib, Samarqand, Qashqadaryo va Jizzax viloyatlari ta’lim berish sifati eng past ko‘rsatkichda, deb baholangan. Xususan, ta’lim sifati past maktablardagi direktorlarning o‘z lavozimida qolishi masalasi qayta ko‘rib chiqilishi aytib o‘tildi.

“Yana bir masala – o‘qituvchilarning bilimi va sifatini oshirish uchun bir yilda 4 marta imtihondan o‘tkazishimiz kerak. Bu bilan bilimli o‘qituvchilarning qo‘shimcha toifa olish imkoniyati ham ko‘payadi. Bu esa joylarda ta’lim sifatining oshishiga o‘zining ijobiy hissasini qo‘shadi”, – dedi Sherzod Shermatov.