Ўзбекистонда янги қурилаётган уй-жой комплекслари орасида қурувчи компаниялар ҳисобидан қўшимча мактаб ҳам қуриб бериладиган бўлди

Халқ таълим вазири Шерзод Шерматов эндиликда девелоперларга ҳар бир янги қуриладиган хонадон учун тахминан 1,5 ўқувчи ўрнини ҳисобга олиб, давлат мактаби қуриб бериш вазифаси юкланганини маълум қилди. Шунда тижорат мақсадларида 1000 та квартирали комплекс қурилса, 1500 ўринли давлат мактаби ҳам қуриб топширилади.

Халқ таълими вазирининг ёзишича, ўтган йили Мирзо Улуғбек туманидаги Темур Малик ва Дўрмон йўллари кесишмасидаги уй-жой комплексларига Президент ташрифи вақтида янги комплексга мактаб зарурлиги сабабли, қурувчи компания томонидан давлат мактаби ҳам қуриб берилиши айтилган. Ҳозирги кунда эса янги 990 ўринли замонавий мактаб битмоқда.

Таъкидланишича, давлат дастури муҳокамасидаги видеоселекторда ушбу ижобий тажрибани барча ҳудудлардаги янги қурилаётган уй-жой комплексларига кенг жорий этиш бўйича Ўзбекистон Президенти томонидан ҳудудлар раҳбарларига қўшимча топшириқ бўлган. Яъни ҳар бир янги қуриладиган хонадонга тахминан 1,5 ўқувчи ўрнини ҳисобини олиб, давлат мактаби қуриб бериш керак бўлади. Шунда тижорат мақсадларида 1000 та квартирали комплекс қурилса, 1500 ўринли давлат мактаби ҳам қуриб топширилади.

«Бир томондан, бошида қурувчи компаниянинг харажатлари кўпайгандек кўринса-да, келгусида компания ушбу уйлардаги аҳоли яхши мактабга яёв чиқа олишини инобатга олиб янги квартираларини бошқа жойдаги квартираларга нисбатан яхшироқ нархга сота олади ва харажатларини қоплаб кетади.

Бу эса ўз навбатида мактабларга ажратилаётган инвестиция дастуридаги мавжуд маблағлар доирасида узоқроқ ҳудудлардаги кўпроқ мактабларни капитал таъмирлашга имконият беради. Чунки вилоят марказида 1 та янги мактаб қуришга кетадиган харажат ҳисобига туманларда камида 10—15 та мактабни зўр қилиб капитал таъмирласа бўлади», — дейилади хабарда.

Шерзод Шерматов ОАВ ва жамоатчилик вакилларини ушбу яхши тажрибани бемалол жойига бориб кўришга, қурувчи ва девелопер компаниялар орасида кенгроқ тарқатишга, жойлардаги бошқа янги қурилишларда ҳам назоратга олишда ёрдам беришга чақирган.

Эслатиб ўтамиз, 2020 йил охирида Шавкат Мирзиёев «2021–2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорни имзолаган эди. Мазкур қарорга кўра, мамлакатда яна 22 та боғча, 31 та мактаб ва 16 та ОТМ қурилиши белгиланган.