Namanganda bayramona dron shou bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Viloyat hokimligi va Kadastr agentligining “Geoinnovatsiya markazi” hamkorligida Namanganda ilk bor tashkil etilgan tomoshada 500 ta dron uchirildi.
Ular yordamida 8 ta shakl hosil qilindi. Humo qushi, tuyalar karvoni, tarixiy obidalar, donishmand qariya timsollari shular jumlasidan.
Belgilangan vaqtdan uch soat o‘tib, 21:50 atrofida boshlangan shou 12 daqiqa davom etdi. Uni Namangan shahridagi “Afsonalar vodiysi” bog‘iga to‘plangan ko‘plab tomoshabinlar bevosita kuzatib bordi, mahalliy televideniye orqali to‘g‘ridan to‘g‘ri efirda olib ko‘rsatildi.
“Geoinnovatsiya markazi” davlat unitar korxonasi direktor o‘rinbosari Qudrat Qulimbetovga ko‘ra, ob-havo sharoiti tadbir uchun biroz noqulay bo‘lishiga qaramay, birorta dron yo‘qotilmadi va qurilmalarga shikast yetmadi.
Eslatib o‘tamiz, oldinroq Buxoroda o‘tkazilgan dron shouda uchirilgan 3 ta qurilma haligacha topilmagani ma’lum qilingandi.
Izoh (0)