Toshkent shahar hokimi Jahongir Ortiqxo‘jayev 13-fevral kuni bo‘lib o‘tgan jamoatchilik bilan uchrashuvda Amir Temur xiyobonidagi kesib tashlangan ko‘p yillik chinorlarga to‘xtalib o‘tdi.
Toshkent shahar rahbaryati tomonidan “Moviy gumbazlar” restorani yonidagi xiyobonda barpo etilishi rejalashtirilgan “Istiqlol” majmuasini qurish ishlari jamaotchilik e’tiroziga sabab bo‘lgan masalalarga oydinlik kiritish maqsadida uchrashuv tashkil etildi.
“Daryo” muxbiri Musulmonbek Ibrohimovning xabar berishicha, muloqot davomida shahar hokimi Amir Temur xiyobonidagi ko‘p yillik chinorlar kesib tashlanganida jamaotchilik nega befarq bo‘lganini o‘rtaga tashladi.
“Amir Temur xiyobonidagi chinorlar kesilgan vaqtda siz qayerda edingiz?”, — deya Jahongir Ortiqxo‘jayev daraxt kesilishiga qarshi chiqayotgan jamoatchilik faollarini so‘roqqa tutdi. Poytaxt hokimi faollar javobini kutmay boshqa masalaga o‘tib ketdi.
Hozirga qadar ma’sullar Amir Temir xiyobonidagi daraxtlarning kesilishi bo‘yicha izoh berishdan o‘zlarini tiyib kelmoqda.
Muloqot davomida poytaxt rahbari “Istiqlol” majmuasi quriladigan xiyobondagi ko‘p yillik daraxtlarning bir tupi ham kesilmasligini, agar shunday hol kuzatilsa ishdan ketishga va’da berdi. Jahongir Ortiqxo‘jayev ikki yil avval xaroba holatdagi xiyobonni ta’mirlash uchun o‘z mablag‘idan 6 milliard sarflaganini ham alohida ta’kidlab o‘tdi. Shuningdek, shahar hokimligining harakatlariga ishonchsizlik bildirayotganlarga qarata, agar deputatlar uni ishdan ketishini istasa lavozimini tark etishga tayyorligini ma’lum qildi.
Izoh (0)