O‘zbekiston Yevropa Ittifoqi bilan kengaytirilgan sheriklik va hamkorlik to‘g‘risidagi bitimni yaqin oylarda imzolaydi. Bu haqda 2025-yil 18-avgust kuni Shavkat Mirziyoyevning “O‘zbekiston, Ozarbayjon va Yevropa: umumiy taraqqiyot yo‘lida hamkorlik” mavzusida o‘tayotgan yuqori darajadagi uchrashuv ishtirokchilariga yo‘llagan murojaatidan ma’lum bo‘ldi.
Prezidentning so‘zlariga ko‘ra, Ozarbayjon Markaziy Osiyo va Yevropani bog‘lashda strategik ko‘prik vazifasini bajarib kelmoqda. O‘zbekistonning Yevropa bilan munosabatlari o‘zining mutlaqo yangi rivojlanish davrini boshidan kechirayotganini qayd etdi.
“Biz Yevropa Ittifoqi va boshqa sheriklarimiz bilan birgalikda samarali transport-logistika va energetika yo‘laklarini rivojlantirish bo‘yicha aniq maqsadga yo‘naltirilgan ishlarni davom ettiramiz. Ishonamizki, ushbu chora-tadbirlar mintaqamizning G‘arb va Sharq o‘rtasidagi xab sifatidagi rolini qayta tiklash imkonini beradi”, dedi Shavkat Mirziyoyev.
2024-yilning noyabrida O‘zbekiston prezidenti va Yevrokengash rahbari sheriklikni kengaytirish masalalarini muhokama qilgandi. Kengaytirilgan sheriklik va hamkorlik to‘g‘risidagi yangi bitimni tez fursatda qabul qilishga alohida e’tibor qaratilgandi.
2025-yilning mart oyida Yevropa Ittifoqining xalqaro hamkorlik bo‘yicha komissarini qabul qildi. Unda so‘nggi yillarda ikki tomonlama hamkorlik, jumladan, siyosiy, savdo-iqtisodiy, investitsiyaviy va madaniy-gumanitar sohalarda jadal rivojlanib borayotgani qayd etilib, uni izchil kengaytirish uchun katta imkoniyat va salohiyat mavjudligi ta’kidlangandi. O‘zbekiston va Yevropa Ittifoqi o‘rtasida kengaytirilgan sheriklik va hamkorlik to‘g‘risidagi yangi bitimning tez fursatda imzolanishi ham bunga xizmat qilishi ma’lum qilingandi.
Shu yilning aprelida Samarqand shahrida bo‘lib o‘tgan “Markaziy Osiyo — Yevropa Ittifoqi” birinchi sammiti yakunida Markaziy Osiyo va Yevropa Ittifoqi o‘rtasidagi munosabatlarni strategik sheriklik darajasiga olib chiqadigan Samarqand deklaratsiyasi qabul qilingandi.
Izoh (0)