“Snos”lar bo‘yicha eng ko‘p noqonuniy qarorlar qabul qilingan hudud Andijon, eng ko‘p kompensatsiya to‘lanmagan hudud Toshkent ekani ma’lum qilindi

Yer egasining roziligi olinmagan, ijarachi bilan kelishilmagan, tegishli xalq deputatlari kengashlarining qarori yoki hukumat qarori chiqarilmagan, Adliya organlarining ijobiy xulosasi olinmagan, kelishuvlar notarial tasdiqlanmagan qarorlar eng ko‘p Andijon viloyatida qabul qilingan. Bu haqda AOKAda o‘tkazilgan brifingda Bosh prokuratura boshqarma prokurori Abdurahim Muhiddinov ma’lum qildi.

Noqonuniy qarorlar Andijonda (48 ta), Toshkentda (11 ta), Namanganda (7 ta), Jizzaxda (6 ta), Qoraqalpog‘istonda (4 ta), Buxoroda (3 ta) va Qashqadaryoda (1 ta) qabul qilingan.

Buning oqibatida, respublika bo‘yicha 1 338 ta holatda mulk egalaridan 221,5 milliard so‘m qarzdorlik yuzaga kelib, ularning huquq va manfaatlari buzilishiga yo‘l qo‘yilgan.

Ta’kidlanishicha, mahalliy hokimliklarning hisobidagi jamg‘armada qoldiq mablag‘lar mavjud bo‘lsa-da, Toshkent shahrida 76,4 milliard so‘m, Toshkent viloyatida 49 milliard so‘m, Sirdaryoda 51 milliard so‘m, Qashqadaryoda 17 milliard so‘m, Surxondaryoda 9,7 milliard so‘m, Jizzaxda 7 milliard so‘m, Samarqandda 5 milliard so‘m, Farg‘onada 2,4 milliard so‘m va Andijonda 2 milliard so‘m qarzdorlik qoplanmagan.

Bundan avval O‘zbekistonda o‘zboshimcha va noqonuniy qurilgan binolar egasi endilikda javobgarlikka tortilishi mumkinligi, Toshkent hokimi 2021-yil oxirigacha “snos”lar bo‘yicha barcha qarzlarni to‘lashga va’da bergani hamda Rasul Kusherbayev “snos”lar bilan bog‘liq muammolarni yechish uchun moratoriy e’lon qilishni taklif etgani haqida xabar berilgandi.