Тошкент шаҳар ҳокими Жаҳонгир Ортиқхўжаев 13 февраль куни бўлиб ўтган жамоатчилик билан учрашувда Амир Темур хиёбонидаги кесиб ташланган кўп йиллик чинорларга тўхталиб ўтди.
Тошкент шаҳар раҳбаряти томонидан «Мовий гумбазлар» ресторани ёнидаги хиёбонда барпо этилиши режалаштирилган «Истиқлол» мажмуасини қуриш ишлари жамаотчилик эътирозига сабаб бўлган масалаларга ойдинлик киритиш мақсадида учрашув ташкил этилди.
«Дарё» мухбири Мусулмонбек Иброҳимовнинг хабар беришича, мулоқот давомида шаҳар ҳокими Амир Темур хиёбонидаги кўп йиллик чинорлар кесиб ташланганида жамаотчилик нега бефарқ бўлганини ўртага ташлади.
«Амир Темур хиёбонидаги чинорлар кесилган вақтда сиз қаерда эдингиз?», — дея Жаҳонгир Ортиқхўжаев дарахт кесилишига қарши чиқаётган жамоатчилик фаолларини сўроққа тутди. Пойтахт ҳокими фаоллар жавобини кутмай бошқа масалага ўтиб кетди.
Ҳозирга қадар маъсуллар Амир Темир хиёбонидаги дарахтларнинг кесилиши бўйича изоҳ беришдан ўзларини тийиб келмоқда.
Мулоқот давомида пойтахт раҳбари «Истиқлол» мажмуаси қуриладиган хиёбондаги кўп йиллик дарахтларнинг бир тупи ҳам кесилмаслигини, агар шундай ҳол кузатилса ишдан кетишга ваъда берди. Жаҳонгир Ортиқхўжаев икки йил аввал хароба ҳолатдаги хиёбонни таъмирлаш учун ўз маблағидан 6 миллиард сарфлаганини ҳам алоҳида таъкидлаб ўтди. Шунингдек, шаҳар ҳокимлигининг ҳаракатларига ишончсизлик билдираётганларга қарата, агар депутатлар уни ишдан кетишини истаса лавозимини тарк этишга тайёрлигини маълум қилди.
Изоҳ (0)