“Deputatlar meni ishdan olib tashlashsa, lavozimimdan ketishga roziman”. Jahongir Ortiqxo‘jayev Toshkent shahar hokimligiga ishonchsizlik bildirayotganlarga javob qaytardi

Toshkent shahar hokimi Jahongir Ortiqxo‘jayev 13-fevral kuni “Istiqlol” majmuasining qurilishi masalasida jamoatchilik vakillari bilan uchrashdi.

“Daryo” muxbiri Musulmonbek Ibrohimovning xabar berishicha, uchrashuvda fuqarolardan biri “Istiqlol” majmuasini barpo etishda jamoatchilik fikri hisobga olinmasligi mumkinligi, shaharda hech kim bilan hisoblashmay bo‘layotgan qurilishlar ko‘pchilikda shahar hokimligiga ishonchsizlik uyg‘otayotganini aytib o‘tdi. Bunga javoban Jahongir Ortiqxo‘jayev shahardagi bitta sifatsiz qurilgan binoni buzdirib tashlaganida aksariyat OAV va blogerlar unga qarshi chiqqanini aytib o‘tdi.

“Ikki yil avval Muhammadbobur degan tadbirkorimiz Mirzo Ulug‘bek tumanida o‘zboshimchalik bilan qulab ketadigan uy qurgan edi. Noqonuniy, sifatsiz qurgani, odamlarning hayoti bilan bog‘liq bo‘lgani uchun men borib o‘sha uyni buzdirib tashlaganman. O‘shanda aksariyat OAV va blogerlar ‘Sen tadbirkorni joyini buzding’, deb menga qarshi chiqqandi. Keyin men qursa-quraqolsin dedim. Buning oqibatida nima bo‘ldi, shaharda hamma shu ishni qilishni boshladi. O‘shanda OAV meni qo‘llab-quvvatlaganida edi, shu ishlar bo‘lmas edi”, — dedi shahar hokimi.

Poytaxt rahbari agar uning ishidan xalq saylagan deputatlar rozi bo‘lmayotgan bo‘lsa, lavozimini tark etishga tayyor ekanligini qo‘shimcha qildi.

“Meni 60 ta deputat saylagan. U deputatlarni esa 20—25 ming nafar xalq saylagan, ular ham xalq vakillari. Agar o‘sha deputatlar meni ishdan olib tashlashsa, lavozimimdan ketishga roziman. Men o‘z vakolatimdan chiqib ketayotganim yo‘q”, — dedi Jahongir Ortiqxo‘jayev.

Avvalroq Jahongir Ortiqxo‘jayev “Istiqlol” majmuasini barpo etish masalasi yuzasidan aholi bilan uchrashgani va bog‘dagi bir dona daraxt kesilsa, o‘sha kuniyoq lavozimidan ketishga tayyorligini ma’lum qilgan edi.

Eslatib o‘tamiz, 4-fevral kuni Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi. Taklif jamoatchilikning keng e’tirozlariga sabab bo‘lgan. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklaridan odamlar dam olish uchun kelishini ta’kidlagan.

Ma’lumot uchun, Toshkent shahar hokimi Jahongir Ortiqxo‘jayev 2019-yil 27-aprel kuni shahar hokimligi binosida investor Muhammadbobur Xo‘jayev va uning sherigi, xususiy quruvchi Aziz Zokirov bilan muloqot o‘tkazgandi. Unda Muhammadbobur Xo‘jayevga o‘ziga tegishli Rishton ko‘chasidagi 106-uyning buzilishi natijasida 600 kishi ishsiz qolib, tadbirkor 1,35 million dollar zarar ko‘rgani bo‘yicha masalalar o‘rtaga tashlanib, ikki tomon muzokara olib borgan.