O‘zbekistonda 2020-yildagi “snos”lar tufayli buzilgan mulklarning yarmidan ko‘p qismiga kompensatsiya to‘lanmagan. Bu haqda AOKAda o‘tkazilgan brifingda Bosh prokuratura boshqarma prokurori Abdurahim Muhiddinov ma’lum qildi.
Prokuratura organlari tomonidan davlat va jamoat ehtiyojlari uchun yer uchastkalari olib qo‘yilishi munosabati bilan buzilgan mulklar bo‘yicha yetkazilgan zararlarning qoplanishi tahlil etildi.
Qayd etilishicha, 2020-yilning 1-yanvar holatiga ko‘ra, buzilgan mulklar bo‘yicha kompensatsiya to‘lovlaridan qariyb 443 milliard so‘m qarzdorlik mavjud bo‘lib, o‘tgan yilda bu qarzdorlikning atigi 202 milliard so‘mi yoki 45 foizi mulk egalariga qoplab berilgan, xolos.
Ma’lumot uchun, to‘langan qarzdorlikning 151,5 milliard so‘mi naqd pul, 10,7 milliard so‘mi yer berish, 39,2 milliard so‘mi mulk berish hisobiga to‘g‘ri kelgan.
Shu bilan birga, hududiy hokimliklar tomonidan buzilishlar bo‘yicha qabul qilingan 52,6 milliard so‘mlik 196 ta qarorlarning 76 tasi yoki 39 foizi bo‘yicha amaldagi tartibga rioya etilmagan.
Eslatib o‘tamiz, Toshkent hokimi 2021-yil oxirigacha “snos”lar bo‘yicha barcha qarzlarni to‘lashga va’da bergandi.
Bundan avval Shayxontohur prokuraturasi Navoiy ko‘chasidagi buzilgan do‘konlardan birining kompensatsiyasi to‘lanmagani sabab Toshkent hokimligini sudga bergani, Rasul Kusherbayev 2021-yilgi davlat budjeti loyihasida “snos”lar bo‘yicha tadbirkorlarga ajratilgan pul juda kamligini tanqid qilgani hamda MIB farg‘onalik tadbirkorning buzilgan do‘koni uchun hokimiyatdan 148 mln so‘m undirgani haqida xabar berilgandi.
Izoh (0)