Toshkent viloyati Ohangaron tumanidagi 48-sonli manzil-koloniyada (avvalgi 69-sonli) F.M. ismli mahbusni kuch ishlatar xodimlar ayovsiz kaltaklagani “Sof.uz” tomonidan e’lon qilindi.
Ma’lum qilinishicha, F.M. 1991-yilda Andijon viloyati Izboskan tumani “Chuvama” QFYda tug‘ilgan. 244-modda (ommaviy tartibsizliklar) bilan olti yilga hukm qilingan. Shu kunlarda F.M. telefon ishlatib, unda diniy ma’ruza eshitgani uchun kaltaklab jazo berilgan.
Holat Zohid ismli mayorning navbatchiligida sodir bo‘lgan. Kaltaklash jarayonida koloniya boshlig‘ining yordamchi navbatchisi Zohid ismli mayordan tashqari “nachalnik oper” Oybek, “starshiy oper” Miraziz qatnashgan.
“ ‘Kalonka’ning avvalgi nomeri 69 bo‘lgan. Uni ikkinchi Jasliq deb ham atashardi. Rahbari J.Z. Jumaboyev, qattiqqo‘lligi bilan kolonkani Jasliqqa aylantirgan ham o‘sha. 2018-yilning yozida rejimi bir oz yumshagan. U oldin bu yerda ishlab ketib qolgan, keyin yana qaytgan. Kaltaklagan operni ham taniyman, poraxo‘r odam. Mahbuslardan pora undiradi-da, yana ‘kazyollik qilma’, deb do‘q ham qilib qo‘yadi”, — deb tushuntirdi nashrga eski mahbuslardan biri.
Ta’kidlanishicha, o‘sha kuni yuqorida aytilgan kishilar F.M.ning oyog‘ining ostiga 50 martadan ko‘p dubinka bilan urgan. Kaltaklash jarayonida mayor “senlar vatan xoinisan, senlarni otib tashlash kerak” deb aytgan.
Oqibatda F.M. yura olmay qolganidan boshliqning oldiga ko‘tarib olib chiqishgan. Boshliq jabrlanuvchining ahvoli og‘irligini ko‘rgan va o‘ziga kelishini hisobga olib 13 kunga ShIZO (jazo kamerasi)ga jo‘natgan. F.M. hozir ham ShIZOda.
Nashrning ma’lum qilishicha, mahbus kaltaklanishi voqeasi tafsiloti tarqalib ketganidan keyin Zohid ismli navbatchi mayorni jazodan asrab qolish uchun vaqtincha lavozimidan ozod etilgan.
“Daryo”ga ma’lum qilinishicha, vaziyatga oydinlik kiritish maqsadida Oliy Majlisning Inson huquqlari bo‘yicha vakili (Ombudsman)ning qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llashning oldini olish bo‘yicha sektor xodimlari Toshkent viloyatidagi 48-son manzil-koloniyaga borib, mahkum F.M. bilan yakka tartibda suhbat olib borgan.Suhbat yakunlari bo‘yicha ma’lumotnoma tayyorlanib, to‘plangan hujjatlar prokuratura organlariga taqdim etilgan va ular tomonidan ekspertlarni jalb etgan holda sud-tibbiy ekspertizasi o‘tkazilishi belgilangan.
Mazkur holat Ombudsman nazoratiga olingan bo‘lib, vaziyatga oydinlik kiritilgach, natijasi bo‘yicha OAVga batafsil ma’lumot taqdim etilishi ta’kidlangan.
Bundan avval marhum turkolog Andrey Kubatin qamoqda qattiq qiynoqlarga solingani, Andijonda fuqaroning qiynoqqa solinishi va kasalxonada vafot etishiga aloqador IIO xodimlariga sud hukmi o‘qilgani hamda O‘zbekistondagi qamoqxonalarda mahkumlarning qiynoqqa solinishi haqidagi videolavha yuzasidan bayonot berilgani haqida xabar berilgandi.
Izoh (0)