O‘zbekistonda koronavirusga qarshi ZF 2001 vaksinasining III bosqich sinovlari doirasida vaksina olgan fuqarolar soni 29-dekabr, seshanba kuni 830 kishiga yetdi. Bu haqda Innovatsion rivojlanish vazirligi xabar berdi.
Xitoyning Anhui Zhifei Loncom Biofarmaceutical kompaniyasi tomonidan yaratilgan mazkur ZF 2001 rekombinant vaksinasining sinovlari ikki-tomonlama noma’lum, platsebo nazorat usulda olib borilmoqda.
O‘zbekistonda ushbu vaksina klinik sinovlari boshlangani 10-dekabr kuni ma’lum qilingan. 26-dekabrga kelib 488 nafar ko‘ngilli ushbu vaksina bilan emlangandi. 29-dekabr kuni vaksina sinovlari davridagi vaksina olgan fuqarolarning soni eng ko‘p qayd etilib, 191 nafar ko‘ngillini tashkil etgan.
Ushbu tadqiqot butun dunyo bo‘yicha bir necha markazlarda 18 yoshdan oshgan jami 29 000 ko‘ngilli ishtirokchini qamrab oladi.
Vaksina sinovlarida ishtirok etishni istaganlar quyidagi havola orqali ro‘yxatdan o‘tishi mumkin.
Avvalroq O‘zbekiston innovatsion rivojlanish vaziri Xitoy vaksinasi masalasida aholini xotirjamlikka chaqirib, sinovda oila a’zolari ham qatnashayotgani, Toshkentda davom etayotgan koronavirusga qarshi vaksinalar sinovida hozircha nojo‘ya ta’sir aniqlanmaganini ma’lum qilgandi.
Shuningdek, vazirlik vaksinaning ushbu sinovi 14 oy davom etishini ma’lum qilgan.
Mavzuga doir:
- O‘zbekistonda Xitoy vaksinasi sinovida aks ta’sir kuzatilsa yoki ko‘ngillilardan biri vafot etsa qanday yo‘l tutiladi?
- O‘zbekistonda koronavirusga qarshi Xitoy vaksinasining sinovi uchun ko‘ngillilar qay tartibda saralab olinadi?
- O‘zbekistonda 2021-yilning iyunigacha aholining 60 foizi koronavirusga qarshi emlanadi
Izoh (0)