Shavkat Mirziyoyev 29-dekabr kuni parlamentga murojaat bilan chiqish chog‘ida mahalla raislarini kerak bo‘lsa hokim qilishga ham tayyorligini bildirdi.
Davlat rahbarining ta’kidlashicha, mahallalarda ishlayotgan malakali va tashabbuskor kadrlarni davlat idoralari rahbarlik lavozimlariga tavsiya etish tizimi yo‘lga qo‘yilishi, endilikda mahalla raislari va ularning o‘rinbosarlarini ham tizimli ravishda tayyorlanishi kerak.
“Mahallada ishlayotgan malakali va tashabbuskor kadrlarni davlat idoralari rahbarlik lavozimlariga tavsiya etish tizimi yo‘lga qo‘yiladi. Davlat akademiyamizga (Prezidenti huzuridagi Davlat boshqaruvi akademiyasi — tahr.) topshiriq bo‘ldi, endi mahalla raislari va ularning o‘rinbosarlarini ham tizimli tayyorlaymiz. Urgut, Shahrixonga o‘xshash katta-katta tumanlarimizda yetti ming, sakkiz ming aholi yashaydigan mahallalarimiz bor. O‘shalardagi mahalla raislarini kerak bo‘lsa hokim qilishga ham tayyorman”, — degan Prezident.
Shavkat Mirziyoyev, shuningdek, mahallaning nufuzini, uning resurs va imkoniyatlarini oshirish, xodimlarining moddiy ta’minotini yaxshilash bo‘yicha dastur ishlab chiqish zarurligini ta’kidlagan.
Avvalroq “Mahalla raisi — islohotchi” tamoyili asosida ijtimoiy muammolarni hal qilish bo‘yicha yangi tizim joriy etilishi ma’lum qilingandi. Shuningdek, tumanlardagi iqtisodiy kompleks xodimlari har bir mahallaga biriktirilib, o‘z sohasiga doir masalalarni hal qilib borishi rejalashtirilgan.
Izoh (0)