Toshkent viloyati hududidagi temiryo‘llarda ikki nafar fuqaroni yuk poyezdi urib ketdi. Halokat fuqarolarning ehtiyotsizligi oqibatida — naushnikni taqib harakatlangani tufayli sodir bo‘lganligi aniqlangan, deb xabar beradi IIV matbuot xizmati. Ulardan biri — 32 yoshli ayol voqea joyida vafot etgan.
Ma’lumotlarga ko‘ra, 22-dekabr kuni soat 13:00 atrofida Toshkent mintaqasida yuk poyezdi 1988-yilda tug‘ilgan fuqaroni urib yuborgan. U qulog‘iga naushnik taqib olib, temiryo‘l izida yurib ketayotgan bo‘lgan. Fuqaro olgan tan jarohati oqibatida voqea joyida vafot etgan.
Shuningdek, 28-dekabr kuni soat 16:25 da Toshkent—Tavar—Sariog‘och yo‘nalishidagi yuk poyezdi, taxminan, 18−20 yoshlar atrofidagi ayol kishini urib yuborgan. O‘rganish ishlari davomida 2002-yilda tug‘ilgan qiz naushnik taqib, temiryo‘l izlarida harakatlanganligi ma’lum bo‘lgan. Ushbu fuqaro jonlantirish bo‘limiga yotqizilgan. Unda aralash jarohat, bosh miya lat yeyishi, bosh miya chayqalishi kabi jarohatlar aniqlangan.
Avvalroq Samarqandda yuk poyezdi naushnik taqqan yigitni urib ketmaslik uchun favqulodda to‘xtashni amalga oshirgani ma’lum qilingandi.
Izoh (0)