Qashqadaryo viloyatining Shahrisabz tumanida 19 nafar nogironligi bor, ijtimoiy og‘ir vaziyatga tushib qolgan xotin-qizga yangi xonadon kalitlari topshirildi, deya xabar berdi “Daryo” muxbiri.
Ta’kidlanishicha, “Qishloqqurilishinvest” MChJ viloyat filiali buyurtmasiga asosan qurib bitkazilgan 144 xonadonli 6 ta ko‘p qavatli uylarning 19 tasi bayram arafasida nogironligi bor xotin-qizlarga berilgan.
“Sakkiz yildan beri uysiz, ijarama-ijara yashab kelayotgandik. O‘tgan yillar davomida ko‘plab murojaatlar yo‘lladim. Bugun Prezidentimiz ko‘magida zamonaviy uylardan biri berildi. Bu nafaqat o‘zim uchun 10 yoshga kirgan bo‘lsa-da, nogironligi sabab o‘sishdan qolayotgan farzandim Ibrohimjon uchun ham Yangi yilga yaxshi sovg‘a bo‘ldi”, — deydi ikki nafar farzandini yolg‘iz tarbiyalayotgan ona Baxtigul Shomurodova.
Viloyatda, shuningdek, Ichki ishlar, Milliy gvardiya, DXX xodimlari uchun ham qurilgan ko‘p qavatli uylar Yangi yil bayrami arafasida foydalanishga topshirilgan.