Koronavirus oqibatida vafot etgan Toshkent shahar Ichki ishlar bosh boshqarmasi Moliya va moddiy-texnika ta’minoti boshqarmasi bo‘lim boshlig‘ining o‘rinbosari, mayor A’loxon Shomahmudov 23-iyul kuni “Jasorat” medaliga munosib ko‘rilgan edi.
Toshkent shahar IIBB Kadrlar boshqarmasining mas’ul xodimlari, Olmazor tumani IIO FMB boshlig‘i polkovnik Abdumajid Mullajonov hamda poytaxt va Olmazor tumani hokimligi vakillari marhum A’loxon Shomahmudovning oilasidan xabar oldi.
Toshkent shahar hokimining iqtisodiyot va tadbirkorlik masalalari bo‘yicha birinchi o‘rinbosari Xotambek Shakirov Olmazor tumani hokimi Baxtiyor Rahmonov bilan A’loxon Abzalovchining onasi Mafrat Ziyodullayevnaga va uning turmush o‘rtog‘i Kamolaga umumiy ishga qo‘shgan hissasi uchun minnatdorchilik va og‘ir yo‘qotish munosabati bilan hamdardlik bildirdi.
O‘zbekiston Prezidentining farmoniga asosan taqdirlangan A’loxon Shomahmudovning oilasiga “Jasorat” medali topshirildi.
Ma’lumot uchun, A’loxon Shomahmudov 2020-yil 13-iyul kuni 36 yoshida vafot etgan. “Daryo” manbasi mazkur xodim koronavirus infeksiyasi asoratlari oqibatida vafot etganini tasdiqlagan.
Eslatib o‘tamiz, Prezidentning tegishli farmoniga binoan A’loxon Shomahmudovdan tashqari, koronavirus oqibatida vafot etgan shifokor Alisher Uralov, Olmazor tumanidagi 18-oilaviy poliklinika katta hamshirasi Feruza To‘xtayeva, Ichki ishlar vazirligi Migratsiya va fuqarolikni rasmiylashtirish bosh boshqarmasining bo‘lim boshlig‘i Shavkat Nafasov, Respublika shoshilinch tibbiy yordam ilmiy markazi Jizzax filiali direktorining davolash ishlari bo‘yicha o‘rinbosari Hamroqulov Botir hamda Respublika shoshilinch tibbiy yordam ilmiy markazi Qoraqalpog‘iston filiali nevrologiya bo‘limi katta hamshirasi Zulfiya Jumaniyozova “Jasorat” medali bilan taqdirlangan.
Izoh (0)