Poytaxt hokimligi “2021-yil uchun Toshkent shahar mahalliy budjetini tasdiqlash to‘g‘risida”gi hokim qarori loyihasini muhokamaga qo‘ydi.
Hujjatga ko‘ra, 2021-yilda budjetlararo transfer miqdori hisobga olinmaganda, barcha tumanlarning daromad va xarajatlari 2,9 trillion so‘mni tashkil etadi. Tumanlar mahalliy budjetlarining daromadlar va xarajatlar prognozlari bo‘yicha eng katta ko‘rsatkich Yunusobod tumani hisobiga to‘g‘ri keladi — 139,7 milliard so‘m. Uning ortidan Olmazor (133,9 milliard so‘m) va Mirzo Ulug‘bek (120,4 milliard so‘m) tumanlari o‘rin olgan.
Sergelidagi Yangi hayot kichik tumani esa 2021-yilda dotatsiyada bo‘ladi — uning xarajatlari daromadidan qariyb to‘rt barobar ko‘p bo‘lishi kutilmoqda — mos ravishda 6,3 milliard so‘m va 24,2 milliard so‘mni tashkil etadi.
Avvalroq Shavkat Mirziyoyev 2021-yil uchun davlat budjetini tasdiqlagani to‘g‘risida xabar berilgandi. Unga ko‘ra, 2021-yilda mamlakat iqtisodiyoti odatdagi ko‘rsatkichlariga qaytishi taxmin qilinmoqda — yalpi ichki mahsulot (YaIM) 688,9 trillion so‘mni, o‘sish sur’ati esa 5,1 foizni tashkil qiladi.
Eslatib o‘tamiz, 2020-yilning avgust oyida Sergelidagi Yangi hayot kichik tumani maydoni poytaxt va Toshkent viloyatidagi 6 tuman hududi hisobiga kengayishi ma’lum bo‘lgandi.
Izoh (0)