Коронавирус оқибатида вафот этган Тошкент шаҳар Ички ишлар бош бошқармаси Молия ва моддий-техника таъминоти бошқармаси бўлим бошлиғининг ўринбосари, майор Аълохон Шомаҳмудов 23 июль куни «Жасорат» медалига муносиб кўрилган эди.
Тошкент шаҳар ИИББ Кадрлар бошқармасининг масъул ходимлари, Олмазор тумани ИИО ФМБ бошлиғи полковник Абдумажид Муллажонов ҳамда пойтахт ва Олмазор тумани ҳокимлиги вакиллари марҳум Аълохон Шомаҳмудовнинг оиласидан хабар олди.
Тошкент шаҳар ҳокимининг иқтисодиёт ва тадбиркорлик масалалари бўйича биринчи ўринбосари Хотамбек Шакиров Олмазор тумани ҳокими Бахтиёр Раҳмонов билан Аълохон Абзаловчининг онаси Мафрат Зиёдуллаевнага ва унинг турмуш ўртоғи Камолага умумий ишга қўшган ҳиссаси учун миннатдорчилик ва оғир йўқотиш муносабати билан ҳамдардлик билдирди.
Ўзбекистон Президентининг фармонига асосан тақдирланган Аълохон Шомаҳмудовнинг оиласига «Жасорат» медали топширилди.
Маълумот учун, Аълохон Шомаҳмудов 2020 йил 13 июль куни 36 ёшида вафот этган. «Дарё» манбаси мазкур ходим коронавирус инфекцияси асоратлари оқибатида вафот этганини тасдиқлаган.
Эслатиб ўтамиз, Президентнинг тегишли фармонига биноан Аълохон Шомаҳмудовдан ташқари, коронавирус оқибатида вафот этган шифокор Алишер Уралов, Олмазор туманидаги 18-оилавий поликлиника катта ҳамшираси Феруза Тўхтаева, Ички ишлар вазирлиги Миграция ва фуқароликни расмийлаштириш бош бошқармасининг бўлим бошлиғи Шавкат Нафасов, Республика шошилинч тиббий ёрдам илмий маркази Жиззах филиали директорининг даволаш ишлари бўйича ўринбосари Ҳамроқулов Ботир ҳамда Республика шошилинч тиббий ёрдам илмий маркази Қорақалпоғистон филиали неврология бўлими катта ҳамшираси Зулфия Жуманиёзова «Жасорат» медали билан тақдирланган.
Изоҳ (0)