Namangan viloyatida 2021-yilning 10-yanvaridan ichimlik suvi ta’minoti va kanalizatsiya xizmatlari tariflari oshiriladi. Xalq deputatlari Namangan viloyati Kengashining 2020-yil 19-dekabrdagi “Namangan suv ta’minoti”ning ichimlik suvi va kanalizatsiya xizmatlari tariflarini tasdiqlash to‘g‘risidagi qarori qabul qilingan.
Unga ko‘ra, xizmat ko‘rsatishdagi xarajatlarni to‘liq qoplash va “Namangan suv ta’minoti”ning rentabelli faoliyat yuritishini ta’minlash maqsadida tariflar oshirilmoqda.
Yangi belgilangan ichimlik suv va kanalizatsiya xizmatlari tariflari aholi uchun quyidagicha:
- 1 kub metr ichimlik suvi maxsus ustama (50 so‘m) bilan 2600 so‘m;
- 1 kub metr oqova suv xizmati maxsus ustama (50 so‘m) bilan 750 so‘m.
Vazirlar Mahkamasining 2013-yil 6-noyabrdagi qaroriga asosan, 2013-yil 1-dekabrdan buyon:
- suv o‘lchash asbobiga ega bo‘lmagan aholi xonadonlariga yetkazib berilgan ichimlik suvi uchun to‘lovlar o‘rnatilgan ichimlik suv tariflariga ko‘taruvchi 1,5 koeffitsiyent qo‘llash yo‘li bilan amalga oshiriladi;
- suv o‘lchash asboblari bilan jihozlanmagan va fuqarolar ro‘yxatga olinmagan turar joylarda ichimlik suvi uchun hisob-kitoblar o‘rnatilgan me’yorlar asosida ichimlik suv tariflariga ko‘taruvchi 1,5 koeffitsiyent qo‘llash yo‘li bilan, bir va ikki xonali xonadonlarga bir kishi, uch xonali xonadonlarga ikki kishi, to‘rt xonali xonadonlarga uch kishi, besh xonali xonadonlarga to‘rt kishi hisobida amalga oshiriladi.
Ko‘rsatilgan ichimlik suvi va kanalizatsiya xizmatlari uchun 2021-yil 10-yanvargacha to‘liq hisob-kitob qilish so‘ralgan, 10-yanvardan boshlab ko‘rsatilgan xizmatlar uchun yangi tariflar asosida hisob-kitob qilinadi (hozirgi tarifga ko‘ra, Namangan viloyatida ichimlik suvi narxi 1 kub metr uchun 1200 so‘m atrofida).
Avvalroq Navoiyda ichimlik suvi va kanalizatsiya xizmati narxi qariyb 3 baravar oshirilishi ma’lum bo‘lgandi. Toshkentda ham ichimlik suvi tariflarini keskin oshirish taklif etilgan. “Toshkent shahar suv ta’minoti” shaharda ichimlik suvi va kanalizatsiya uchun narxlar oshirilishiga izoh berib, tizim va tarmoqlarning eskirganligi tufayli suv ta’minotida uzilishlarning oldini olish, ichimlik suvi va kanalizatsiya xizmatlarining sifatini oshirish bo‘yicha 2021-yilga rejalashtirilgan tadbirlarni inobatga olgan holda yangi tariflar bo‘yicha takliflar tayyorlanganini bildirgan.
Izoh (0)