O‘zbekistonda elektr energiyasi bo‘yicha qarzdorlik 3,5 trillion so‘mni tashkil etmoqda. Bu haqda AOKAda tashkil etilgan matbuot anjumanida “Hududiy elektr tarmoqlari” AJ boshqaruvi raisining birinchi o‘rinbosari Jahongir Obidjonov ma’lum qildi.
“Elektr energiyasi bo‘yicha eng katta qarzdorlik Samarqand viloyatida: 655 milliard so‘m. Bu jami ko‘rsatkich, ya’ni yuridik va jismoniy shaxslarning umumiy qarzdorligi”, — deya aniqlik kiritadi Obidjonov.
Ayni vaqtda respublikamiz bo‘yicha 3,5 trillion so‘m qarzdorlik mavjud. 1-dekabr holatiga ko‘ra, aholining elektr energiyasidan qarzdorligi — 2,34 trillion so‘mni tashkil qilmoqda. 1-oktabr holatiga ko‘ra, bu qarzdorlik — 2,38 trillion so‘m bo‘lgan.
“2 oy ichida ushbu qarzdorlik holati 40 milliard so‘mga kamayishiga erishildi. Bu — aynan billing tizimi joriy qilinishi natijasi”, — deydi “Hududiy elektr tarmoqlari” AJ rahbari.
Avvalroq Energetika vazirligi nega elektr ta’minoti uchun mavjud qarz to‘langandan so‘ng, elektr energiyasi avtomatik tarzda ishga tushmasligiga javob bergandi. Unga ko‘ra, ASKUE tizimi iste’molchilarning 100 foizini qamraganidan so‘ng to‘liq tartibda ishlay boshlaydi. Bugungi kungacha 72 foiz iste’molchilarga ushbu turdagi hisoblagichlar o‘rnatilgan. Ushbu tizimga to‘liq ulanish 2021-yil apreligacha rejalashtirilgan.
Izoh (0)