Chilonzor metro yo‘nalishini Buyuk Ipak yo‘li bekatidan TTZ mavzesigacha yerusti metro liniyasi bilan uzaytirish rejalashtirilmoqda. Bu haqda “O‘zbekiston 24” telekanalidagi “Tahlilnoma” dasturida ma’lum qilindi, deb yozmoqda Spot.
“Bu poytaxtga Chirchiq, G‘azalkent, Qibray va viloyatning boshqa shaharlaridan keladigan Toshkent viloyati aholisi uchun qo‘shimcha qulayliklar yaratadi”, — degan poytaxt transport boshqarmasi boshlig‘i Anvar Jo‘rayev.
2021-yilda Qo‘yliq bekatidan Qipchoq bekatigacha qurilish ishlarini yakunlash rejalashtirilgan bo‘lib, bu yo‘nalishlarni birlashtirish imkonini beradi.
2022-yilda TTZ tomonga qarab bir nechta bekatlar qurish rejalashtirilmoqda.
Mutaxassislarning fikriga ko‘ra, bugungi kunda poytaxtda aholining atigi 33 foizi jamoat transportidan foydalanadi, rivojlangan shaharlarda bu ko‘rsatkich 60-70 foizni tashkil qiladi. Quruvchilarning aytishicha, yangi metro bekatlari qurilishi aholini metro xizmatlari bilan qamrab olish darajasini oshirish imkonini beradi.
Yangi metro bekatlarning ochilishi jamoat transportining 56 ta yo‘nalishini optimallashtirishga, 170 ming kishiga transport xizmatini yaxshilashga imkon berdi va yo‘lga sarflanadigan vaqtni 15-20 daqiqaga kamaytirdi.
Eslatib o‘tamiz, Toshkentda 2020-yil Mustaqillik bayrami arafasida Toshkent yerusti metrosining birinchi bosqichi (“Do‘stlik-2” — “Qo‘yliq” oralig‘i) va “Yunusobod” yo‘nalishida ikkita yangi stansiya foydalanishga topshirilgan edi.
26-dekabr kuni uning yana bir muhim bo‘g‘ini – Sergeli yo‘nalishi ishga tushirildi. Ushbu yo‘nalish bekatlaridan metroga chiqish 1-yanvargacha bepul bo‘ladi.
Izoh (0)