Navoiy shahri markazidagi viloyatning yonib ketgan bosh archasi o‘rniga yangisi o‘rnatildi. Bu haqda viloyat hokimligi matbuot xizmati xabar berdi.
27-dekabr kuni 19:00 atrofida Navoiy shahri markazidagi viloyatning bosh archasida yong‘in kelib chiqqandi. Hodisa joyidan video va fotolar ijtimoiy tarmoqlarda e’lon qilingan.
Mutaxassislarning dastlabki o‘rganish natijalariga ko‘ra, yong‘in archaga o‘rnatilgan elektr kabellarining yomg‘ir yoqqan vaqtda namiqib, qisqa tutashuv keltirib chiqarishi oqibatida yuzaga kelgan bo‘lishi mumkin.
28-dekabr kuni uning o‘rnida yangi archani o‘rnatish ishlari boshlangan. “Yangi yilni barchamiz tiriklik ramzi bo‘lgan yam-yashil archa atrofida o‘tkazamiz”, — deyiladi hokimlik xabarida.
Eslatib o‘tamiz, 23-dekabr kuni Farg‘ona shahridagi Markaziy dehqon bozori oldiga o‘rnatilgan bayram archasi uni bezab turgan chiroqlardagi qisqa tutashuv natijasida to‘liq yonib ketgani haqida xabar berilgan edi. 26-dekabr kuni esa Termizdagi Surxondaryoning bosh archasi ag‘darilgani ma’lum bo‘lgandi.
Izoh (0)