O‘zbekiston 10 yillik tanaffusdan so‘ng Tojikistonning So‘g‘d viloyatiga gaz yetkazib berishni qayta tiklagani haqida xabar berilgandi. “Gazeta.uz” Sugdnews’ga tayanib xabar berishicha, 23-dekabr kuni viloyatning Xo‘jand shahrida o‘zbek gazini ishga tushirishning ramziy marosimi bo‘lib o‘tdi.
Viloyatga o‘zbek tabiiy gazining asosiy yetkazib beruvchisi “So‘g‘diyonagaz” hisoblanadi. “Dastlabki bosqichda Xo‘jand shahrining sanoat korxonalari gaz bilan ta’minlanadi. Hozirgi vaqtda ularning yarmidan ko‘pi muqobil yoqilg‘iga o‘tishni e’lon qildi. Kelgusida kompaniya aholining tayyorligiga qarab tabiiy gazni bosqichma-bosqich yetkazib berish niyatida”, — degan kompaniya direktori Abduhakim Sufiyev.
Uning aytishicha, kelishuvga ko‘ra, O‘zbekiston tomoni 1000 kubometr tabiiy gazni Tojikistonga 130 dollardan sotishga tayyor bo‘lib, bu “juda qulay narx”. O‘n yil oldin xuddi shu miqdordagi yoqilg‘i narxi 340-360 dollarni tashkil etgan.
Qayd etilishicha, Xo‘jand shahrida 150 dan ortiq sanoat korxonalari faoliyat ko‘rsatmoqda. Ulardan ba’zilari o‘n yildan ko‘proq vaqt oldin, tabiiy gaz yetkazib berilishi to‘xtatilganda, yoqilg‘ining boshqa turlari — elektr energiyasi va ko‘mirdan foydalangan.
O‘zbekistondan Tojikistonga gaz yetkazib berish 2012-yilda to‘xtatilgan edi. 2018-yil sentabr oyida O‘zbekiston tabiiy gaz ta’minotini tikladi.
2020-yilning birinchi yarmida Tojikiston O‘zbekistondan 144 million kubometr miqdorida tabiiy gaz import qilgan. Import hajmi, “Tojiktransgaz” OAJ ma’lumotlariga ko‘ra, 17 million dollarni tashkil etdi.
Avvalroq Tojikiston o‘z aholisini ta’minlash uchun O‘zbekistondan gaz importini ko‘paytirishni rejalashtirayotgani haqida xabar berilgandi.
Izoh (0)